JASKKODAHTTON JIENAT – HISTORJJÁLAŠ SÁMI FILBMAÁŊGIRUŠŠAN LEA ÁLGÁN

JASKKODAHTTON JIENAT

– HISTORJJÁLAŠ SÁMI FILBMAÁŊGIRUŠŠAN LEA ÁLGÁN

Ovdánahttinprográmma Jaskkodahttin jienat lea dál álgán. Ovdánahttinprográmma čohkke logi filbmadahkki ja njealje ođđa váikkuhanbuvttadeaddji, geat galget ovdánahttin ođđa filbmaprošeavttaid mat čatnasit assimileremii Sámis, ja Duohtavuođa- ja soabadanprosessii.

Ovdánahttinprográmma filbmadahkkit leat Aarni Pieski, Berit Marie Lise Eira, Elle Sofe Sara, Eiril Linge, Johannes Vang, Mattias Persson Suorra, Moa Backe Åstot, Ole-Henrik Lifjell, Paulina Feodoroff ja Petter Tuolja Köhler. Váikkuhanbuvttadeaddjit leat Pigga Filenius, Jolanda Magga ja Kati Eriksen.

Ovdánahttin prográmma galgá fikšuvdna- ja dokumentárafilmmaid bokte loktet ovdan sámiid vásáhusaid mat leat guhkit áiggi leamaš jaskkodahtton, ja galgá láhčit saji ságastallamii ja soabadeapmái, sihke Norggas, davviriikkain ja riikkaidgaskasaččat.

– Filmmas lea fápmu guoskkahit váimmuid ja jurdagiid buolvvaid ja riikkarájáid rastá. Jaskkodahtton jienat ovdánahttinprográmmain mii ráhkadit saji Sámi filbmadahkkiide loktet ovdán muitalusaid maid vuođđun lea min oktasaš historjá. Ulbmil lea ahte dát filmmat galget olahit gehččiid sihke Sámis ja máilmmiviidosaččat ja boktit ságastallama ja beroštumi soabadanprosessii, muitala ISFI direktevrra Anne Lajla Utsi.

Mentorat prográmmas leat Amber Morning Star Byars, Alice Quinlan, Nils Gaup, Tine Klint, Bård Kjøge Rønning, Fabien Greenberg ja Siljá Somby.

– Mis leat mielde internašunála dási dokumentára ja guhkesfilbmadahkkit ja buvttadeaddjit, ja mii illudit doarjut oasseváldiid ja sin filmmaid ovdánahttima, dadjá Utsi.

Oassálastit ja mentorat čoahkkanedje njukčamánu gaskkamuttus Guovdageidnui, ja prográmma joatká neahta bokte.

Jaskkodahtton jienat prográmma bokte ISFI doarju sihke dokumentára- ja fikšuvdnafilmmaid, guhkes- ja oanehisfilmmaid. Filbmadahkkit ožžot bagádallama ja nu besset ovdanahttit sin filmmaid sihke bargobájiid bokte, mentoriid vehkiin ja riikkaidgaskasaš váikkuhan-kampánnja bokte.

Ovdánahttinprográmma leat ruhtadan Internašunála Sámi Filbmainsituhtta, Seastinbáŋku-Davvinorga Samfunnsløftet, ja York University Canadas – Curating Indigenous Circumpolar Cultural Sovereignty.