Netflix ja ISFI álggaheaba ovttasbarggu

Internašunála Sámi Filbmainstituhtta ja Netflix almmuheaba ahte leaba álggahan ovttasbarggu nannen ja ovddidan dihtii sámiid jiena Davviriikain.

Netflixa ja Internašunála Sámi Filbmainstituhta (ISFI) ovttasbargu lea oassin Netflix Fund for Creative Equity, man ulbmilin lea láhčit ođđa vejolašvuođaid máŋggabealatvuođa nannemii guoimmuhansuorggis oahpahusa ja hárjehallama bokte.

Prográmma lea doarjjan ođđa taleanttaide oahpu ja hárjehallama bokte, ja áigumuššan leage ahte Sámi taleanttaide rahpasit vejolašvuođat searvat doaimmaide kameraid duohken ja doarjut sin ovdáneami filbmasuorggis.

– Mii leat hui ilus go beassat almmuhit ovttasbarggu birra dakkár stuorra fitndogain nu go Netflix lea. Dát láhčá ođđa vejolašvuođaid min filbmadahkkiide Sámis. Mii háliidit muitalit min iežamet muitalusaid ja dát ovttasbargu deattuha dan. Ja sávvamis mii sáhttit olahit Sámi muitalusaiguin maiddái riikaidgaskasaš gehččiid dán ovttasbarggu olis, dadjá ISFI direktevra Anne Lajla Utsi.

– Dát čájeha ahte Sámi ja álgoálbmot muitalusain lea mearkkašupmi máilmmiviidosaččat ja dat leat geasuheaddjit riikaidgaskasaš filbma ja neahttarávdnjen industriijai.

Anne Lajla Utsi, ISFI Direktevra

– Mii eat sáhtašii leat eanet rámis ovttasbarggus ISFI:in; nu rikkis muitalanárbevierru ja mii illudit oaidnit mo mii sáhttit ovdánahttit daid muitalusaid viidáseabbot. Netflix bealis mii háliidit doarjut servožiid guovlluin gos mii doaibmat, nu ahte fátmmastit boahttevaš filbmadahkkiid ja addit vejolašvuođa ođđa jienaide beassat oidnosii, dadjá Film Netflix Nordics direktevra Claire Willats.

Claire Willats, Film Netflix Nordics Direktevra

Lágidit bargobáji Sámis

Vuosttaš bargobádji mii lágiduvvo dán ovttasbarggu olis lea Guovdageainnus čakčamánu 23.-24. beivviid, 2022. Fáddán dan bargobájis lea Buvttadeami bušeteren ja plánen. Dán bargobáji jođiha buvttadeaddji Steve Clark-Hall (Sherlock Holmes, The State). Oasseváldit ohppet bargobájis vugiid mo beaktilit sáhttet plánet ja hálddašit áigeplánaid optimála organiserema dáfus. Bargobádji lea heivehuvvon linjábuvttadeddjiide, buvttadeddjiide ja veahkkebagadalliide geat háliidit oahppašuvvat eanet alla dási TV-ráidubuvttadeami plánemii ja bušeteremii. Oasseváldiiide galggašii leat oahpis MovieMagic Scheduling ja MovieMagic Budgeting.

Guovtti beaivásaš bargobádjái searvan lea nuvttá, muhto mii sáhttit váldit mielde dušše ráddjejuvvon meari oasseváldiid. Jos áiggot searvat bargobádjái de mana dán siidui: Sign up form – Kautokeino. Oasseváldit geat servet bargobádjái goappeš beivviid ožžot Netflix Grow Creative duođaštusa searvamis.