ÁRRUS MÁILMMI PREMIEÁRA BERLIINNA INTERNÁŠUNÁLA FILBMAFEASTIVÁLAS 2026
Almmuhuvvon: 14.01.2026
ÁRRU OAŽŽU MÁILMMI PREMIEÁRA BERLIINNA INTERNÁŠUNÁLA FILBMAFEASTIVÁLAS 2026
Vuosttaš sámi luohte drámá, Árru, maid Elle Sofe Sara lea bagadallan, lea válljejuvvon Panorama prográmmii 76. Berlin International Film Festivalas (Berlinale), ja oažžu máilmmi premieára Berlinas guovvamánus.
Lea hui erenoamáš ja measta áddetmeahttun ahte Árru oažžu vuosttaščájáhusa Berlinales. Ollusat leat bidjan návccaid ja váimmuset filmma dahkat. Ja dál viimmat deaivvada min vuosttaš mánná máilmmiin. Mun lean eallán dego iežan máilmmis nu guhkká filmmain, ja mun lean sihke balus ja sáhkkii ahte mo geahččit vuostáváldet filmma, muitala Sara.
Berliinna Internášunála Filbmafestivála lea okta máilmmi stuorámus filbmafestiválain, ja Panoramaoassi lea dovddus das ahte čájehit roahkkadis, ođđaáigásaš filmmaid ja lea bivnnut sihke gehččiide ja kritihkkariidda.
Internašunála Sámi Filbmainstituhta direktevra, Anne Lajla Utsi dadjá ahte lea erenoamáš ahte filbma beassá ovtta máilmmi stuorámus filbmalávddiide.
Dát lea hirbmat buorit ođđasat ahte Elle Sofe Sara luohtemusihkála Árru lea válljejuvvon Berlin Internašunála filbmafestiválii Panorama prográmmii. Lea stuora gudni Elle Sofe Sarai ja olles filbmajovkui ahte Árru beassá ovtta máilmmi stuorámus filbmalávddiidde. Dát mearkkaša maid ollu olles sámi filbmaealáhussii ja čájeha ahte sámi filmmas lea lunddolaš sadji internašunála filbmalávddis, dadjá Utsi.
ÁRRU BIRRA
Boazodoalli Maia viggá gáhttet iežas guovllu ruvkedoaimmas. Go dáistaleamit čuožžilit son dorvvasta iežas čeahcái, muhto dát boktá dološ hávkaduvvon váivviid. Maia šaddá válljet ahte gádju go eatnamiid ja seammás bidjá bearraša váddásit dillái, vai botke go jávohisvuođa.
Bagadalli: Elle Sofe Sara | Čállit: Johan Fasting, Elle Sofe Sara | Neavttárat: Sara Marielle Gaup Beaska, Áyla Gáren Nutti, Simon Issát Marainen, Mikkel Gaup. | Filbmen: Cecilie Semec | Šuokŋa: John Erik Kaada | Čuohppi: Michal Leszczylowski | Buvttadandesigner: Otto Lume. | Buvttadeaddjit: Stær A.S (No) , Garagefilm International (SE) , It’s Alive (FIN), Elle Sofe Company (Sápmi). Ruhtadeaddjit: Internašunála Sámi Filbmainstituhtta, Norgga Filbmainstituhtta, Ruoŧa Filbmainstituhtta, Suoma Filbmafonda, Arctic Film Norway, Sámediggi (No), New Dawn, Eurimages, Nordisk Film & TV Fond, NRK, YLE, SVT, ja Cadre Bord.
BAGADALLI BIRRA
Elle Sofe Sara lea koreográfa, bagadalli ja filbmadahkki Guovdageainnus eret. Su ođasmáhtti dáiddajietna ovttastahttá sámi lihkadeami, vuoiŋŋalašvuođa ja luođi filmmain ja lávdedáidagiin. Son lea vuoittán máŋga stuora bálkášumii sihke oanehisfilmmaiguin ja dánsáčájálmasaiguin. Maŋemus jagiid lea Sara Vástádus eana-čájálmas johtán riikkaidgaskasaččat stuora feastiválain. Sara lea maid beaggán go lea ráhkadan luohte- baleahta Láhppon / Lost Norggá Nášunálabalehtti. Árru lea Sara vuosttaš guhkesfilbma, ja lea máilmmi vuosttas sámi luohte-drámá.
ABOUT BERLIN INTERNATIONAL FILM FESTIVAL
The festival will take place in Berlin, Germany, from February 12 to 22, 2026. The Berlinale is widely regarded as one of the major film festivals in the world, alongside Cannes, Venice, Sundance, and Toronto, and is the largest public film festival worldwide with around 300,000 tickets sold and tens of thousands of visitors and industry professionals attending each year.
Internašunála Sámi Filbmainstituhtta lea dorjon Árru filmma min doarjjaortnegiid bokte.
Govat Dánel Røkke bokte.