Sámi filbmabargiid oahpahalliprográmma FILM EXČELERATOR SÁPMI lea álgán

FILM EXČELERATOR SÁPMI

Stuorra Sámi filbmabargiid oahpahalliprográmma lea álgán

Dán vahkkoloahpa deaivvadedje 14 ođđa oahpahalli Guovdageainnus. Dát oahpahalli prográmma lea stuorámus sámi filbma oahpahalliprográmma dássážii. Ulbmil lea hukset teknihkalaš ja dáiddalaš čehppodaga olles filbmasuorggis buot dásiin buvttadeamis, ja ráhkkanahttit oahpahalliid bargat stuorát filbmabuvttademiin Sámis ja internationála dásis.

Oahpahalliprográmma álggahuvvui oanehisfilbma bargobájiin, gos oahpahallit leat ráhkadan golbma minuvtta guhkes oanehis balddonasmuitalusa.

– Sámi filbma- ja tv-ealáhus lea stuorrume jođánit, ja sámi filmmat leat miehtá máilmmi lávddiin. Dáinna oahpahalli prográmmain mii leat hukseme ja nanneme máhtu ja fágačehppodaga buot surggiin sámi filbmabuvttadeamis. Mii dárbbašit sihke sámegielat čuhppiid, bivttasduojáriid ja eará filbmafágalaš fágačehppodaga hukset dápe Sámis. Dáinnalágiin mii maid láhčit guoddevaš ja innovatiiva boahtteáiggi sámi filbmaealáhussii, dadjá Anne Lajla Utsi, ISFI direktevra.

Dán vuosttaš deaivvadeamis ožžo oahpahallit hárjáneami albma filbmabuvttadeamis, sihke filbmen, bagadallan, čuohppan, ja gárvet oanehisfilmma jiena ja VFX. Juohke oahpahallis lei dihto suorgi maid čuovui ja čađahii.

Oahpahallit leat Naina Helén Jåma, Henrik Nutti, Jonathan Vang, Erja Taskinen, Nora Fossan, Sinituuli Kalttopää, Ilja Magga, Anni Rauna Triumf, Pigga Filenius, Anna Kajsa Aira, Laila Susanna Kuhmunen, Takakehto Charles, Elin Oskal, Olena Hætta ja Ellen Oddveig Hætta (ii sáhttán searvat dán vahkkoloahpa)

Fágačeahppit ledje Per Josef Idivuoma (buvttadeaddji, Forest People buvttadanfitnodag, Lisa Kristensen (buvttadeapmi ja čuohppan, Forest People Production Company), Ken Are Bongo(filbmen), Nils Gaup (bagadallan), Mats Støten ja Morten Suhr Pettersen (jietna), Markus Dahlstrøm (VFX), Hanna Suni (art department), and Nina Erdahl (bikstasat).

Dás duohko ožžot oahpahallit vejolašvuođa čiekŋudit válljejuvvon surggiide, ja servet stuorát filbmabuvttademiid Sámis dahje eará sajis máilmmis.

Oahpahallit besset bargat ieš guđet filbmasurggiin, nu go bagadallan, filbmen, jietna, buvttadeapmi, jietna, VFX, bivttasteapmi ja dáiddalaš oasis, ja vel eambbo. FILM EXČELERATOR prográmma ulbmil lea nannet Sámi filbmabargiid, addit oahppu ja hárjáneami ja movttiidahttit boahttevaš Sámi filbmabargiid buot virggiin ja dásiin filbmabuvttadeamis.

ISFI, Talent Norge ja Seastinbáŋku 1 Davvi-Norga ovttasbarget ovdánahttinprográmmain FILM EXČELERATOR SÁPMI. Oahpahalliprográmma fállá gelbbolašvuođaloktema, monterveahkki, ja bálkká, ja vejolašvuođa oahpásmuvvat internationála filbmaealáhusfierpmádaga čuovvovaš jagi. Loga eambbo dás.

Buot govat leat Mads Suhr Pettersen bokte.