Sámi buvttadeddjiid bargobádji lea álgán

Sámi filbmabuvttadeddjiid bargobádji 2024/2025

Sámi filbmabuvttadeddjiid bargobádji dahje Sámi Producer Lab, álggii golggotmánu álggus Guovdageannus. Bargobádji lea ovttasbargu gaskal Netflix, EAVE ja Internašunála Sámi Filbmainstituhta. Dát guđa mánnosaš prográmma addá oktanuppelot válljejuvvon sámi filbmabuvttadeaddjái vejolašvuođa ovdánahttit iežaset máhtolašvuođa prošeaktaovddideamis ja filbmasuorggis.

Buvttadeaddjit dehálačča

Internašunála Sámi Filbmainstuhta direktevrra Anne Lajla Utsi čilge manin buvttadeaddjit leat dehálačča sámi filbmaealáhusas.

Sámi filbmaealáhus dárbbaša iežas buvttadeddjiid, go mii fertet sihkkarastit eaiggátvuođa min sámi filmmaide. Nanu buvttadanfitnodagat leat eaktun sámi filbmaealáhusa ovdáneapmái boahtteáiggis, muitala Anne Lajla Utsi.

Čuovvola buvttadeami bálgá

Issát Ovllá Kati, dahje Kati Eriksen, oassálastá bargobájis. Son lea ovdal buvttadan ja bagadallan dokumentára Ruoktojohka / Home River (2023) ja áigu dál čuovvolit fáttá Deatnogátti birra ja dálkkádatrievdama váikkuhusaid deanuleahkái.

Son muitala ahte álggus áiggui oanehis filmma ráhkadit, muhto maŋŋá dán vuosttaš vahkku bargobájis de lea mokta ráhkadit guhkit filmma.

Maŋŋá mu vuosttaš filmma Ruoktojohka, dovden ahte buvttadeapmi lei juoga mainna háliidin joatkit. Dát bargobáddji lea dahkan ahte dovddan iežan olu sihkkarabbot, ja lea nanusmahttán dovddu ahte háliidan joatkit buvttadeamiin. Mun liikon ohcat ruđaid ja mu bargovásáhusaid ektui de máhttán maid byrokráhtalaš áššiid bures.

Geahča oasi Kati ságastallamis dás.

Guorahallá fysalaš, vuoiŋŋalaš ja dovduičuohci lanjaid

Ole-Henrik Lifjell lea maid oassin sámi buvttadeddjiid bargobájis. Son bargá oanehis dokumentárain mas lea bargonamma Gåetie, gos guorahallá goađi sajádaga.

Lea árbevirolaš goađi birra, dahje derhvie gåetie (lååvht gåetie). Guorahalan makkár fysálaš, vuoiŋŋalaš ja dovduičuohci lanjat gávnojit fysálaš lanjas, ja makkár árbeviruid mii fievrridat viidásit. Dokumenteren rievdadeami min servvodagas oppalaččat ja man lahkai dát guoská globála áddejumis mii okta ruoktu lea, muitala son.

Geahča oasi Ole Henrik ságastallamis dás.

Bargobáji čeahppit

Sámi buvttadeddjiid bargobáji / Sámi Producer Lab čeahppit leat earet eará Petri Kemppinen, joavkojođiheaddji Emile Hertling Péronard (Ánorâk Film / Polarama Greenland), guhkesfilbma giehtačálus čeahppi Nayeem Mahbub, bargobáji jođiheaddji Tamara Dawit (Gobez Media), ja dokumentára giehtačálus čeahppi Sylvia Stevens. Deaddil namaid beasat oaidnit sin rávvagiid filbmadahkkiide.

Bargobáji birra

Sámi buvttadeddjiid bargobádji dahje The Sámi Producer Lab lea ovttasbargu gaskal Internašunála Sámi Filbmainstuhta, Netflix ja EAVE. Bargobájis ožžot sámi filbmabuvttadeaddjit guhtta mánu bagadallama ja čuovvoleami. Bargobádji álggahuvvui golggotmánus Guovdageainnus, ja joatká neahta bokte.

Bargobádji gokčá deaŧalaš beliid filbmabuvttadeamis, nu go prošeaktaovdánahttin, ruhtadeapmi, bušeahttabarggut ja ohcamat, co-buvttadeapmi, vuovdin, ja ulbmiljoavkkuid guorahallan.

Lassin besset oasseváldit oahpásnuvvat fitnodat- ja fitnodatplánemii, ja ožžot reaidduid mat dárbbašuvvojit go galget lihkostuvvat filbmaealáhusain. Leat maid joavkobarggut, logaldallamat ja individuála deaivvadeamit.

Loga eambbo prográmma birra dás (eaŋgalas gillii)