ISFI ođđa taleantaprográmma FILM EXČELERATOR SÁPMI
Almmuhuvvon: 24.06.2025
ISFI almmuha FILM EXČELERATOR SÁPMI –
Historjjálaš taleantaprográmma Sámi filmma várás
Internašunála Sámi Filbmainstiuhtta (ISFI) ja Talent Norge almmuha ođđa taleantaprográmma FILM EXČELERATOR SÁPMI – fágaidrasttideaddji ja ollislaš prográmma mii nanne ja ovddida ođđa jienaid sámi filbma- ja tv-buvttadeamis.
ISFI fállá ovttas Talent Norge ja Seastin-Báŋku 1 Davvi-Norgga servodatloktema doarjagiin, oahpahallansajiid gitta 15 oasseváldái. Juohkehaš oažžu heivehuvvon gelbbolašvuođaloktema, internašunála ealáhusfierbmádaga, ja oahpahallanvejolašvuođa sihke sámi ja globála filbmabuvttademiin.
Dát prográmma lea viidásamos mii goassege lea ásahuvvon Sámis, ja fátmmasta ovddeš oahppahanprográmmaid, oahpahallansajiid ja mentor-ordnegiid filbmabargiide ja filbmadahkkiide buot surggiin. Suorggit leat ee giehtačálus, čuohppan, bagadallan, jietnabargu, bivttasteapmi, animašuvdna ja VFX.
– Dá lea historjjálaš ovdáneapmi sámi filmma ektui. Dáinna mii gilvit vejolašvuođa olles filbmaealáhusii šaddat ja áhtanuššat, ja dát nanne buohkaid, ii dušše bagadalli ja giehtačálli, muhto buohkaid geat servet loktet sámi muitalusaid internašunála gehččiidde, dadjá ISFI direktevrra Anne Lajla Utsi.
– Sámi filbma lea čájehan issoras stuorra vejolašvuođaid maŋimus jagiid. Mis lea dál nana vuođđu mii sihkkarastá ahte dát vejolašvuohta hálddašuvvo ja ovddiduvvo guoddevašvuođain. Mii leat rámis go doarjut dán áŋgiruššama mii sihke gáhtte ja ovddida sámi muitalanárbevieru, dadjá Silje Riise Næss, Talent Norge direktevrra.
Alice Marie Jektevik lea FILM EXČELERATOR SÁPMI prográmma koordináhtor.
– Mis lea oktasaš álggaheapmi Guovdageainnus gos oasseváldit besset oahppásmuvvat ISFIi ja sámi filbmaealáhussii. Dađistaga oažžu juohkehaš heivehuvvon ovdánahttinplána ja praktihkkálaš hárjáneami oahpahallin sámi- ja internašunála buvttademiin, dadjá Jektevik.
Oasseváldit besset maid máttkoštit riikkadgaskkasaččat.
– Lassin bovdet miii oassálastit Sámi ja internašunála filbmafestiválain. Doppe besset oahppásmuvvat filbmaealáhusain ja hukset fierbmádaga. Jos dát orro miellagiddevaš de ávžžuhan ohcat, dadjá Jektevik.
Prográmma almmuhuvvui geassemánu 24. b ja ohcanáigi lea borgemánu 15. beaivvi. Prográmma áigodat lea 2025-2026.
Bajimuš govas oainnát taleantakoordináhtor Alice Marie Jektevik fárrolagaid ođđa oahpahalliin Olena Hætta ja Takakehto Charles, ja Monica Borg Fure, Talent Norges. Sii oassálastet justa dál Talent Norge fierbmádatbeivviin Hársttákas.