Searvva SÁMI STORYŽAT LABii ja ráhkat ođđa Sámi oanehisfilmma báru!
Almmuhuvvon: 13.08.2025
Searvva SÁMI STORYŽAT LABii
ja ráhkat ođđa Sámi oanehisfilmma báru!
Sámi Storyžat Lab lea oanehisfilmmaid bargobádji mas vuolggasadji lea 7 Sámi stories ráiddu buori lihkostuvvan. Sámi Storyžat Lab bargobáji višuvdna lea oktasaš buvttadeapmi 2026:as!
Badjel logi jagi áigi rabai 7 Sámi Stories uvssaid filbmamáilbmái sámi filbmadahkkiide. Otne leat sii lávken guhkesfilmmaid ja tv-ráidduide. Dál, ISFI fárrolagaid Netflix ja Tatino Films bokte, bovde ođđa sámi filbmadahkkiid oassálastit ođđa bargobádjái Sámi Storyžat Lab. Dát lea áibbas ođđa oanehisfilmmaid ovdánahttinprográmma. Dán háve mii ohcat logi sámi filbmadahkki geain leat logi ođđa oanehisfilmma jurdaga. Bargobájdji lea inspirerejuvvon 7 Sámi Stories buori lihkustuvvamis.
Badjel logi jagi lei Elle Márjá Eira oassálasti 7 Sámi Stories bargobájis iežas filmmain Iđitsilba. Iđitsilba ja guhtta eará sámi oanehisfilmma mátkkoštedje 7 Sámi Stories ráidduin meahttá máilmmi. Dál Eira máhccá mentorin Sámi Storyžat Lab bargobádjái inspireret ođđa buolvva Sámi filbmabargiid. Loga min ságastallama Elle Márjá Eirain dás vuolábealde!
Bargobájis Sámi Storyžat Lab beassá oasseváldi ovdánahttit giehtačállosa. Ovdánahttimis álggát vuos čállit giehtačállosa, ja veahkkin leat bargobáji oahpaheaddjit. Go ozat, de sáhttá ohcat giehtačállin dahje joavkun mas leat sihke giehtačálli ja buvttadeaddji nu ahte sáhttá prošeavtta ráhkkanahttit buvttadeapmái. Bargobáji višuvdna lea oktasaš buvttadeapmi 2026:as. Lea vejolaš ohcat bargobáddjái dál, ja ohcanáigemearri lea bearjadaga, borgamánu 15. beaivvi.
JEARAHALLAN:
Elle Márjá Eira muitala 7 Sámi Stories ja ođđa Sámi Storyžat Lab birra
Elle Márjá Eira lea bagadalli, artista, buvttadeaddji ja šuohkŋadahkki Guovdageainnus eret. Son lea áiddo bagadallan beakkán Netflix guhkesfilmma Stolen (2024). 2014:is , álgojagiid su karrieres, son lei oassin 7 Sámi Stories iežas filmmain Iđitsilbbain. Dát lei su vuosttaš gearddi go son bagadalai filmma. Dál son lea mentor ja oahpaheaddji Sámi Storyžat Lab bargobájis. Loga su vásáhusaid 7 Sámi Stories ektui ja makkár vejolašvuođaid dát buvttii.
Mo lei leat oassin dákkár stuorit bargobájis 7 Sámi Stories 2014/2015 ?
Lei hirbmat somá ja ohppen máiddai hui olu. Mii báddimet álggos Sámi bojá dálvet ja fas Iđitsilbba čákčat. Jurddášiin dalle ahte dál meinen leat veaha “crazy” nu ahte mun jerren beakkánis neavttariin leat mielde mu vuosttaš oanehisfilmmas maid bagadallen. Muittán ahte mun ja Sarakka leimma hui bálus deaivat sin ovddalgihtii.
Mo vulggii Iđitsilbba filbmajurdda?
Gullen eatnis ládjogáhppira dahje čoarvegáhppira birra. Mun in diehtan in maidege dan birra! Nu mun álgen ohcat dieđuid dán gáhppira birra. Lei váttis gávdnat dieđuid muhto ožžon veahki Sámedikkis. Gávnnaimet dieđuid sin girjerádjosis.
Manne servet 7 Sámi Stories bargobáddjái?
Serven go Elle Sofe Sara jearai ahte sáhtan go buvttadit su oanehisfilmma “Sámi Bojá”. Ledjen álgán juo “Iđitsilba” giehtáčállosa čállit dien áigge. De lei okta gii geassádii ja mun ožžon sáji searvat maiddai Iđitisilba filmmain. Nu ahte mus ledje guokte filbmaprošeavta mielde 7 Sámi stories.
Mo lei bargat seamma bargojoavkkuin ja hábmet čieža gárvves oanehisfilmma fárrolagaid?
Ohppen olu, mii veahkeheimmet nubbi nuppi ja ovttasbarggaimet. Dat mielddisbuvttii ahte beasaimet sámegiela hupmat filbmema oktavuođas. Mis ledje measta aivve sámi filbmabargit.
Mii lea deháleamos oahppu dán proseassas?
Mun ohppen eanemus das go bargen boastut!
Makkár vejolašvuođaid lea 7 Sámi Stories rahpan du karriere ektui??
Deiven mu boahttevaš bargoguimmiid,ruhtadeddjiid ja oahpásmuvven filbmabirrasii. Ja dieđusge bessen čájehit filmmaid miehtá máilmmi jiešguđetgelágan filbmafestiválain. Vel otná beaivve ge ain jerret čájehit sihke Sámi Bojá ja Iđitsilbba. Jáhkán diet guokte filmma leaba čájehuvvon lagabui duhát geardde oktiibuot iešguđetgelágan báikkiin, festiválain ja doaluin. Leaba maiddai oidnon NRK1:is.
Mii lea du buoremus ráva sidjiide geat háliidit geahččalit dahkat filmmaid?
Muital muitalusaid mat leat du váimmu lagamusas.
Manin galggašedje sámi filbmadahkit searvat Sámi Storyžat Labii dál 2025?
Lea somá geahččalit ovttasbargat hárjánan filbmabargiiguin ja maiddái geahččaladdat. Ii leat goasse beare maŋŋit dahje beare árrat álgit filmmaiguin bargat. Lea gal bahá ahte don dasa darvánat!
Elle Márjá Eira birra
Elle Márjá Eira lea bagadalli, artista, buvttadeaddji ja šuoŋkadahkki Guovdageainnus eret.Son gullá Láhkonjárgga orohahkkii. Son lea bagadallan guhkesfilmma STOLEN, mii lea TOP 10 gaskkas 71 riikkas Netflix rávdnjenbáikkis. Son lea maid bagadallan NRK ráiddu MAKTA episode čieža. Eira lea maid bagadallan oanehisfilmmaid ja videoinstallašuvnnaid. Son lea ráhkadan ja neaktán Beaivvás Sámi Teáteris, ovttasbargan Christophe Beck filmmas The 12th Man, ha čájehan iežas bargguid Venice ja Kochi Biennales. Son dávjá ráhkada filbmamusihka ja mátkkošta máilbmeviidosaččat iežas musihkain. Govven: Marie Louise S. Hætta / Árvu.
7 SÁMI STORIES duogáš
Giđa 2013, ISFI čohkkii Sámi filbmadahkkiid bargobádjái Guovdageidnui ráhkadit oanehisfilmmaid. Mihttu lei buvttadit máŋga oanehisfilmma mat ovttasbarge ruhtadeami, buvttadeami ja distribušuvnna ektui. Dát oktasaš lahkoneapmi attii vejolašvuođa jovkui olahit viidát seamma láhkai go guhkesfilmmain. Prošeavttas geavahedje seamma profešunealla bargojoavkku ja attii Sámi filbmadahkkiide vejolašvuođa bargat fárrolagaid alla dásis. Filmmain lei sámegiella dahje sámi kultuvrra guovddážis, leat filbmejuvvon Guovdageainnus, ja ledje gárvá čavčča 2014. Beassážiid rájes gitta čakčamánnui buvttadedje filmmaid olles leavttuin, ja post-buvttadeapmi dahkkui measta gitta Tromsø International Film Festival (TIFF) premierii ođđajagimánus 2015.
7 Sámi Stories (2014)
Ellos Sápmi (Per Josef Idivuoma & Niillas A. Somby)
Edith og Aljosja (Ann Holmgren)
Iđitsilba (Elle Márjá Eira)
Áile ja áhkku (Silja Somby)
Hilbes biigá (Marja Bål Nango)
Sámi bojá (Elle Sofe Henriksen)
Giksašuvvon ealli (Egil Pedersen)
Váldogovva: Iđitsilba, govven Johan Mathis Gaup.
Elle Márjá Eira govva, Marie Louise S. Hætta / Árvu bokte.