GARRAT DU VÁIMMU VÁLLJEJUVVON SAN SEBASTIÁN FILBMAFESTIVÁLA GILVUI

GARRAT DU VÁIMMU GILVALA SAN SEBASTIÁN FILBMAFESTIVÁLA ALIMUS BÁLKKAŠUMIS

Amanda Kernell filbma Garrat du váimmu / Brace your heart lea válljejuvvon San Sebastián International Film Festival gilvui Golden Shell, festivála alimus gilvu ja dehálamos bálkkašupmi.

Filbma oažžu eurohpas premiera San Sebastiánas čakčamánus maŋŋá máilmmi vuosttaš čájálmasa Toronto International Film Festivalas (TIFF). Torontos lea filbma váljjejuvvon Platform gilvui.

Mearkkaša ollu sámi filbmamáilmái ahte Amanda Kernell filbma lea válljejuvvon gilvalit guovtti stuorra internašunála filbmafestivála gilvvus.

“Toronto ja San Sebastián buktá erenoamáš internašunála fuomášumi Garrat du váibmui. Ahte gilvala guovtti máilmmi stuorámus festivála dehálamos lávddiin lea hirbmat olahus Amanda Kernellii ja olles filbmajovkui,” dadjá Anne Lajla Utsi, ISFI direktevrra.

Filmma lea Amanda Kernell čállán ja bagadallan. Filmma buvttadeaddjit leat Nordisk Film Production Ruoŧŧa (Eva Åkergren), co-buvttadeaddji lea Forest People (Sápmi/Norga), Compass Films (Islánda), Invictus (Bulgaria), Nordisk Film Production Dánmarku, Filmpool Nord, SVT ja Film i Väst.

Ahte filbma lea San Sebastián lea maid stuorra olahus sámi co-buvttadeaddjái Forest People, Lisa Kristensen ja Per-Josef Idivuoma. Jagi 2025 buvttadeigga Kristensen ja Idivuoma ovttas sámi tv-ráiddu A Sámi Wedding / Heajastallan, mas lei máilmmipremieara TIFF Primetime prográmmas. Brace Your Heart lea dasto Forest People nuppi jahki Toronto Internašunála Filbmafestiválas ja fitnodaga vuosttaš háve San Sebastián filbmafestiválas.

“Sámi filbma beaggá viidát, ja dát čájeha man guhkás sámi filbma lea ollen. Mii oaidnit dál ođđa buolvva sámi neavttáriid, filbmadahkkiid ja buvttadeddjiid geat buktet duostilis muitalusaid máilmmi lávdái. Min násttit, filbmabargit ja buvttadeaddjit barget dál alimus internašunála dásis, ja ovddidit sámi muitalusaid ja perspektiivvaid gehččiide miehtá máilmmi. Dát lea gelddolaš áigi min ealáhussii. Dát lea erenoamáš, ii dušše dán filbmii, muhto dát lea deaŧalaš dáhpáhus olles min filbmaservodahkii” dadjá Utsi.

Garrat du váimmu birra

Buvttadeapmi: Nordisk Film Production Ruoŧŧa, co-buvttadeaddji lea Forest People (Sápmi/Norga), Compass Films (Islánda), Invictus (Bulgaria), Nordisk Film Production Dánmarku, Filmpool Nord, SVT ja Film i Väst.
Neavttárat: Elli Sara Valkeapää, Andte Gaup-Juuso, Vincent Niia, ee.
Filbma čuovvu 20-jahkásaš Ejva, gii váldá badjelasas boazodoalu go su áhčči jápmá. Son šaddá jođiheaddji Heaika háldui, gii ráhkástuvvá sutnje. Go Heaikka vilbealli Nejla boahtá, de ráhkástuvvá Ejva ges vuosttaš geardde. Dáhpáhusat mat čuvvot dagahit ahte Ejva rahčá bisuhit iežas eallima bálgás ja jurddašuvvon boahtteáiggi.

Toronto International Film Festival lágiduvvo 10-20 b. čakčamánus 2026, ja San Sebastián International Film Festival lágiduvvo 18-26 b. čakčamánus 2026.

Govva: Lead Elli Sara Valkeapää i Brace your heart. Govven: Sophia Olsson.