Árktalaš álgoálbmot filmmat New Yorkii – ON álgoálbmot bissovaš forumii
Almmuhuvvon: 14.04.2023
ISFI ja AIFF ovttas ee. Sámiráđiin lágidit side-event ON álgoálbmot bissovaš forum oktavuođas
Fáddá lea mo filmmaid ja media bokte sáhttá čalmmustahttit árktalaš álgoálbmogiid rahčama dálkkádatrievdamiid vuostá.
Čalmmustahttit man dehálaš filbma lea
– Dá lea okta daid dehálamos álgoálbmot čoahkkimiin máilmmi dásis. Lea erenoamáš ahte dákkár oktavuođas beassat čalmmustahttit man dehálaš filbma lea go galgá bidjat fuomášumi álgoálbmotáššiide, min eallimii ja hástalusaide árktalaš guovlluin, dadjá ISFI direktevrra Anne Lajla Utsi.
Filmmain loktet árktalaš álgoálbmogiid jiena
– Filmmain sáhttit loktet árktalaš eamiálbmogiid jiena dálkkádatrievdamiid olis. Dát ON čoahkkin lea deháleamos čoahkkin loktet politihkalaččat dáid áššiid álgoálbmogiidda, ja mii leat hui duhtavačča go Sámiráđđi čalmmustahttá dán ášši dáinna hámiin, dadjá Liisa Holmberg AIFFas (Arctic Indigenous Film Fund).
Prográmma álgá panelaságastallamin ja vuostáiváldimin bearjadaga cuoŋománu 21.beaivvi. Filbmačájeheapmi lea lávvardaga cuoŋománu 22. beaivvi ja čalmmustahttá arktálaš guovlluid dálkkádatrievdamiid hástalusaid.
– Arktálaš guovlu lea olu álgoálbmogiid ruovttuguovllut, ja lea dehálaš ahte mis álgoálbmogiin leat min iežamet jietna go čalmmustahttit hástalusaid min guovlluin. Lea erenomáš dehálaš čájehit dálkkádat rievdademiid hástalusaid ja váikkuhusaid, ja rievdadusat mat dahkkojit ruoná industrialiserema namas arktálaš álgoálbmogiid guovlluin, dadjá ISFI direktevrra Anne Lajla Utsi.
Anne Lajla Utsi ja Kyle Reinhart (American-Scandinavion Foundation) rahpaba doaluid, ja ON álgoálbmot foruma jođiheaddji Dario Meija Montalvo, Sámiráđi presideanta Aslak Holmberg, ja suoma olgoriikkadepartemeantta arktálaš ambassadevrra Petteri Vuorimäki celket dearvvuođaid.Liisa Holmberg Arctic Indigenos Film Fund (AIFF) bealis searvá panelaságastallamii.
Panelaságastallamis oassálastet maid filbmabagadalli Elle Máijá Tailfeathers, filmmabuvttadeaddji Emile Herling Péronard, ja filbmabagadalli Anna Hoover. Sin jearahallá Jason Ryle.
Lávvardaga cuoŋománu 22 beaivvi čájehuvvojit njealje filmma: Salmon Reflection (dir. Anna Hoover, Alaska, 2022); oanehis dokumentára Ealát (dir. Elle-Marja Eira, Sápmi, Norway, 2021), oanehisfilbma Ivalu (dir. Anders Walter, co-dir. Pipaluk K. Jørgensen, prod. Rebecca Pruzan, Kim Magnusson, co-prod. Emile Hertling Péronard, Denmark/Greenland, 2023), ja guhkesfilbma Night Raiders (dir. Danis Goulet, Canada; prod. Taika Waititi, New Zealand, 2021).
Side-event lea stuorra olahus
Lea vuosttaš gearddi ahte ISFI ja AIFF leat ON álgoálbmotáššiid bissovaš forum almmolaš prográmmas mielde. ISFI:s ja AIFF:s leamaš guhkit áiggi niehku doallat dákkár side-event dáhpáhusa ON bálgoálbmotáššiid bissovaš forum oktavuođas.
– Lea stuorra olahus ISFIi ja AIFFii. Mii leat hui duhtavačča ja rámis go beassat doallat justa dán dáhpáhusa dán jagi New Yorkas, ON bissovaš foruma oktavuođas, dadjaba Utsi ja Holmberg.
Doalut leat ovttasbargu gaskal American-Scandinavian Foundation, Arctic Indigenous Film Fund (Kautokeino, Sápmi), International Sami Film Institute, Saami Council (Sápmi), Film.gl Greenland Film Makers (Nuuk, Greenland), University of the Arctic — UArctic — Education & Research Network in the Arctic.
ON álgoálbmotáššiid bissovaš forum lágiduvvon New Yorkas cuoŋománu 17-28.b. Fáddá dán jagi lea Álgoálbmogat, olbmo dearvvašvuohta, eatnama dearvvašvuohta ja dálkkádatrievdamat – vuoigatvuođalaš lahkoneamis.