ÁRRAN 360° Premieres at the Venice Biennale 2022 as part of `The Sámi Pavilion´

ÁRRAN 360° vuosttaš čájáhus Venezia Biennálas 2022 oassin Sámi Paviljonga 

 

Historjjálaš vuosttaš: guhtta sámi filbmadahkki válljejuvvon ráhkadit 360° filbmadáidaga

26. borgemánu – 13. čakčamánu 2022, San Servolo, Venezia

Maŋŋebárga, 1. njukčamánu, 2022 – Internašunála Sámi Filbmainstituhtta (ISFI) illuda almmuhit, ahte sin ođđa prošeakta ÁRRAN 360° oažžu máilmmi vuosttašeahkeda oassin Sámi Paviljonga 59. Venezia riikkaidgaskasaš dáiddabiennálas 2022. ÁRRAN 360° lea ISFI álggahan prošeakta, ja ovttasbargoguoimmit leat  OCA (the Office for Contemporary Art Norway) ja Norgga filbmainstituhta NFI. ÁRRAN 360° gullá historjjálaš Sámi Paviljonga prográmmii, mii váldá saji ja nuppástuhttá Davviriikkaid paviljonga hámi Venezia Biennálas jagis 2022.

ÁRRAN 360° lea ođđaáigásaš sámi filmma ja digitála media ovdanbuktin. Dát áidnalunddot dáiddaprošeakta ovdanbuktá  guhtta sámi filbmadahkki originála filmma, mat čájehuvvot 360° šearpmas stuora lávus.

“Árran lea davvisámegielat sátni, mii čilge lávu váimmu, man birra sámi máinnasteapmi lea dáhpáhuvvan don doloža rájes”, lohká ISFI direktevra Anne Lajla Utsi. “ ÁRRAN 360° čájáhusain mii háliidit bovdet máilmmi gehččiid vásihit min girjás muitalanvuoiŋŋa ja fátmmastit gehččiid min máilmmioainnuin ja eatnamiin gulahallamiin.”

Anne Lajla Utsi – ISFI direktevra. Govva: Marie Louise Somby.

Anne Lajla Utsi – ISFI direktevra. Govva: Marie Louise Somby.

ÁRRAN 360° ovdanbuktá čuovvovaš sámi filbmadahkkiid ja sin dáiddalaš bargguid:

Ann Holmgren Aurebekk, Ovias – Nuorra nissonolmmoš vánddardišgoahtá niehkolágan ilbmái, gos son oahppá, ahte buot min unnimus dagutge dán máilmmis čuhcet njuolgá eará duohtavuođaide.

Elle Márjá Eira, EALLU – girdnu – Reindeer Corral Dán filmmas geahčči beassá vásihit girdnu váimmu, go bohccot johttet birrat birra, ja dovdat boazoealáhusa lunddolaš fámolašvuođa.

Hans Pieski, Muohtačalmmit – Surrealisttalaš filbmaduodji guorahallá čázi agálaš fámu ja olbmuid sorjjasvuohta dasa.

Liselotte Wajstedt, Eadni – Mother – Háldi lea meahci vuoigŋa, guhte geahččala dájuhit mánáid su lusa. Leago háldi beare sámi mytologiija hutkkus vai juoga nu duohta go don ja mun?

Marja Helander, Áfruvvá – Mermaid – Áfruvvá lea meara fuođđu – heavvanan olbmo gopmi. Son áibbaša lieggasa ja iđista mearas olmmošsoga hilgon eatnamii ja vásiha olmmošvuođa guoros museas.

Silja Somby, Daate dijjien – Go báhppa rievida goavddi, álgá mátki áiggi ja gomuvuođa čađa, mii čájeha goavddi čiekŋalis fámu.

Buot filmmat leat dál buvttadeamis, ja guhkit filbma govvádusat almmustahttot neahttasiiddus, mii almmuhuvvo ovdal vuosttašeahkeda.

3D málle ÁRRAN 360° filbmalávus, man sisa muddejuvvo 360° gráda viiddis šearbma. Govva: M12 Kultur AS.

3D málle ÁRRAN 360° filbmalávus, man sisa muddejuvvo 360° gráda viiddis šearbma. Govva: M12 Kultur AS.

ÁRRAN 360° čájáhus lea historjjálaš maiddái nuppe dáfus: filmmat čájehuvvot Venezia Biennales filbmalávus, man siste lea 360° gráda viiddis šearbma. Filbmalávvu ceaggana venezialaš San Servolo sullo  davágeahčai – Venezia Internašunála Universitehta šilljui – gaskkal Giardini della Biennale ja Lido, mii lea beakkán Venezia filbmafestivála ruovttuguovlu. Dán birrasii šaddá áidnalunddot dáiddalaš deaivvadanbáiki, ráhkaduvvon eamiálbmogiid oppamáilmmálaš, čiekŋudeaddji muitalusaid ja guorahallamiid várás.

ÁRRAN 360° lea oaidninláhkái 26. borgemánu – 13. čakčamánu 2022 oassin historjjálaš Sámi Paviljonga virggálaš prográmmas Venezia Biennales 2022. Davviriikkaid paviljonga hámi nuppástuvvan ávvuda sámiid dáidaga ja suverenitehta ja álbmoga,  man ruovttueatnamat rasttidit Davviriikkaid rájáid gitta Guoládatnjárgii Ruššii. ÁRRAN 360° čájáhusas šaddá viiddis prográmmafálaldat, masa gullet dáiddalaš logaldallamat ja doalut, dego eamiálbmot Augmented Reality (AR) ovdanbuktin, seminárat, ságastallamat ja árktalaš eamiálbmogiid 360° filbmačájáhus, man leaba kurateren Julie Nagam ja Heather Igloliorte guovttos Kanádas. Lassedieđut prográmmas almmuhuvvojit maŋŋelaš.

Katya García-Antón, OCA direktevra, konsuleanta ja Sámi Paviljonga mielkuráhtor. Govva: Marta Buso / OCA.

Katya García-Antón, OCA direktevra, konsuleanta ja Sámi Paviljonga mielkuráhtor. Govva: Marta Buso / OCA.

“Rabas bovdehusa bokte válljejuvvon guhtta filbmadahkki ovdanbuktet sámi dáiddalaš geahčastagaid valljivuođa ja nana hutkáivuođa fámu, mii gávdno miehtá Sámi.  Sii čalmmustahttet sámi servodahkii mávssolaš gažaldagaid, mat leat relevánttat olles máilbmái. Sii duođaštit vuot oktii filmma ja digitála reaidduid fámolašvuođa sámi máilmmioainnuid ovdánahttimis”, lohká OCA direktevra, konsuleanta ja mielkuráhtor Katya García-Antón Sámi Paviljonga prošeavttas. “Ovttas ISFI ja NFI bargoguoibmin, mii movttegit fállat ođđa hutkás arena daidda erenoamáš muitaleddjiide vai sii sáhttet iskat sin dáiddalaš rájáid. Dát muitalusat eai leat ovdal čájehuvvon stuorra šearpmas.”

ÁRRAN 360° buvttadeapmi lea jođus: bagadalli Elle Márjá Eira lea bargamin 360° filmmain Eallu girdnu – Reindeer Corral.

ÁRRAN 360° buvttadeapmi jođus: bagadalli Elle Márjá Eira lea bargamin su 360° filmmain EALLU – girdnu – Reindeer Corral.

“Mii leat čeavlát ovttasbargat ÁRRAN 360° prošeavttain,” lohká Norgga filbmainstituhtta CEO Kjersti Mo. “ÁRRAN 360° ovddasta dehálaš oasi máilmmi kultuvrras ja árbbis. Mii illudit ovdanbuktit dáid filmmaid ođđa gehččiide hutkás formáhtain, mii gudnejahttá sámi kultuvrra rikkes muitalanvuogi.”

Kjersti Mo - Norgga filbmainstituhtta CEO. Govva: Einar Aslaksen.

Kjersti Mo – Norgga filbmainstituhtta CEO. Govva: Einar Aslaksen.

Internašunála Sámi Filbmainstituhtta (ISFI)  galgá nannet sámi filbmabuvttadeami ja loktet gelbbolašvuođa ja ekonomalaš vejolašvuođaid ovdánahttit, buvttadit ja čájehit sámegielat filmmaid.

The Norwegian Film Institute (NFI) lea almmolaš instituhtta, mii doaibma kulturministeriija suorggis. NFI lea stáhta hálddahuslašorgána filbmasuorggis ja ráđđeaddi filbmapolitihka guoskevaš áššiin.

Office for Contemporary Art Norway  (OCA) lea non-profit foandda, man Norgga kultur- ja olgoministeriijat ásaheigga jagis 2001. OCA ulbmil lea ovddidit dáiddáriid gaskasaš gulahallama Norggas, Sámis ja riikkaidgaskasaš dáiddasuorggis ságastallandilálašvuođaid ja čájáhusaid bokte. OCA doarju Norgii sajáiduvvan dáiddáriid ja sin doaimmaid miehtá máilmmi. OCA lea leamaš ovddasvástádusas Norgga visuála dáidaga ossodagas Venezia Biennálas jagi 2001 rájes.

Preassagovat:
https://drive.google.com/drive/folders/1qHMaws8IvWcIkdHCPYvv4cJUM3HY8_3N?usp=sharing

Lassedieđut:

Anne Lajla Utsi, Director International Sami Film Institute, contact: annelajla@isfi.no
Katya García-Antón, Director Office for Contemporary Art Norway (OCA), contact: katya.garcia-anton@oca.no