Braunschweig Filbmafestivála fuomášuhttá sámi filmmaid

SÁMI FILMMAT BRAUNSCHWEIGAS

Braunschweig International Film Festivála bidjá erenoamáš fuomášumi sámi filmmaide dán jagi, ráidduin

 “Sámi Cinema – Stories from the North“. Festivála lágiduvvo skábmamánu 11-17 b. 2024, ja festiválas čájehuvvojit oktiibuot 8 sámi guhkesfilmma ja 5 oanehis filmma. 

– Lea mearkkašahtti ahte Braunschweig International Filbmafestivála lea válljen čalmmustahttit ja loktet ovdán sámi filmmaid. Leat sihke klasihkkálaš filmmat nu go Ofelaš ja ođđa áigeguovdilis filmmat čeahpes sámi filbmadahkkiid bokte. Mii leat nu duhtavačča dáinna ovttasbargguin Braunschweig International Filbmafestiválain, ja illudat beassat čájehit buori sámi filmmaid gehččiide Braunschweigas, dadjá Sámi Filbmainsituhta direktevrra Anne Lajla Utsi.

Váldogilvvus mielde  

Sara Margethe Oskala filbma Eallogierdu / Tundra Within Me (2023) lea mielde festivála váldogilvvus.

Lassin čájehuvvojit maid ođđa ja klasihkkálaš filmmat nu go Egil Pedersena Biru Unjárga / My Father’s Daughter (2024), Katja Gauriloff Je’vida (2023), Suvi West Máhccan / Homecoming (2023) ja Eatnameamet (2021), Ole Giævera Ellos Eatnu – Let the River Flow (2023), Amanda Kernell Sameblod / Sami Blood (2016), ja Nils Gaup Ofelaš / Pathfinder (1987).

Oanehis filmmat 

Oanehis filbma oasis beassá geahččat Elle Máijá Tailfeathers Bihttoš, Sunná Nousuniemi & Tuomas Kumpulainen Áhkkuin, by Kati Eriksen & Scott Thornton Ruoktojohka / Home River, Flavia Devonas Hoffmann Human Habitat, ja Elle Márjjá Eira Ealát.

Braunschweig International Film Festival

Filbmafestivála lágiduvvui vuosttaš gearddi 1987:s, Braunschweigas Duiskkas. Festivála geasuha badjel 20.000 guossi ja lea okta dain stuorámus festiválain Davvi-Duiskkas. Jahkásaččat čalmmustahttojuvvo okta dihto fáddá, ja dán jagi leat sámi filmmat ja sámi filbmadahkkit.

Loga eanet festivála birra dás.