Goalmmát Sámi filbma Toronto Internationála Filbma Festiválii

Guhkesfilbma Je´vida lea válljejuvvon Toronto Interntational Film Festiválii

– Mii leat áibbas gealdagasas go goalmmát sámi filbma lea válljejuvvon TIFFii, ovtta máilmmi stuorámus ja deháleamos filbmafestiválaide. Dát čájeha ahte Sámi filmmat ollejit guhkkás ja gilvalit máilmmi buoremusaid gaskka. Dát lea erenoamáš jahki sámi filmmain Toronto International Filbma festiválas, dadjá Internášunala Sámi filbmainstuhta direktevrra Anne Lajla Utsi.

Je´vida lea vuosttaš nuortalaš guhkesfilbma, ja čállit leat Katja Gauriloff ja Niillas Holmberg. Maiddái dokumentára Máhccan / Homecoming maid Suvi West bagadallá, ja guhkesfilbma Eallogierdu / The tundra Within me maid Sara Margrethe Oskal lea čállán ja bagadallan galget čájehuvvot dán stuorra filbmafestiválas Torontos čakčamánus.

Je’vidas lei premiera geassemánus New Yorkas Tribeca filbmafestiválas, ja lihkostuvai bures. Filbma guorahallá ja čuoldá oktii golbma iešguđetge áigodagaid Sámi álbmoga historjjás Suomas maŋŋá soađi.

Toronto Internášunála filbmafestivála lágiduvvo čakčamánus Canada stuorámus gávpogis Torontos, ja lea vurdon ahte čohkke váile 500.000 filbmageahčči. Ovdalaččas lea Utsi čilgen ahte lea hui mávssolaš sámi filmmaid boahtteáigái go sámi filmmat leat válljevvon TIFFii.

– Dát láhčá buriid vejolašvuođaid ja fuomášumiid min filmmaide. Lea maid hui dehálaš go dát maid čajeha ahte sámi filmmat leat bivnnuhat máilmmi dásis ja dát lea maid deahálaš viidaset ruhtadeapmái sámi filmmaide, dadjá Anne Lajla Utsi.

Okta máilmmi stuorámus filbmafestiválain

Toronto Internationála filbmafestivála (TIFF) lea okta máilmmi stuorámus filbmafestiválain ja lea maid A-festivala. Lea vuosttaš geardde golbma sámi filmma leat válljejuvvon čájehuvvot TIFFas. Festivála lea ovtta máilmmi deháleamos filbmavuovdalanbáikiin, ja filbmagávppašeaddjit bohtet miehttá máilmmi gávppašit ja geahččat filmmaid.

Dokumentárafilbma Máhccan čájehuvvo čakčamánu 8. Ja 9. beaivvi,Eallogierdu čájehuvvo čakčamánu 11. Ja 13. beaivvi. Je´vida čájehuvvo Torontos čakčamánu 14. Ja 15 beaivvi.

ISFI lea ruhtadan ja dorjon dáid filmmaid.

 

---

Eanet filmmaid birra

---

Je’vida
Nuortalaš Iida, vuorrasit Sámi nisu, lea guođđán iežas duogáža assimilašuvnna dihtii. Filbma govvida golbma historjjálaš áigodaga ja guorahallá sápmelaččaid eallinvuorbbi Suomas maŋŋá suođi.
Bagadalli: Katja Gauroloff
Čállit: Katja Gauriloff, Niillas Holmberg
Buvttadeaddji: Joonas Berghäll, Anna Nuru, Satu Majava, Oktober

 

---

Eallogierdu / The Tundra Within Me
Lena lea orron máŋga jagi Oslos ja máhccá ruovttoluotta Sápmái iežas bártnážiin dutkat sohkabeliid iežas ođđa dáiddaprošektii. Doppe son deaivvada ja ráhkásnuvvá boazosápmelažžii Máhttii. Gáren, guhte lea siidaeamit ja Máhte eadni, lea hui vuostá ja vuosttalda ovttastallama. Seammás rahčá Lena ja váivahuvvá mearrádusain maid dagai nuorran. Son ferte gávnnahit sáhttá go goassege su ja Máhte eallimiid ovttastahttit.
Čálli ja bagadalli: Sara Margrethe Oskal
Buvttadeaddji: Mona J. Hoel, Freedom From Fear

---

Máhccan – Homecoming
Dokumentára filbma Máhccan / Homecoming gieđahallá museamáilmmi ja sámedávviriid máhcaheami. Bagadalliguoktá Suvi West ja Anssi Kömi buktiba dieđuid ja peršuvnnálaš muitalusa go sámedávvirat máhccahuvvojit Sápmái.
Čálli: Suvi West
Bagadallit: Suvi West ja Anssi Kömi
Buvttadeaddji: Janne Niskala, Vaski Film

 

---