ISFI juolluda 2.1 MNOK buvttadeapmái
Almmuhuvvon: 19.06.2025
ISFI juolluda 2.1 MNOK čieža buvttadeapmái
Vihtta oanehisfilmma, okta dokumentára ja okta animašuvdna ožžot buvttadandoarjaga dán jagi nuppi juolludanvuorus.
STÁLLUBOJÁ OĐĐA DIHTOR
Animašuvdna / Buvttadanfitnodat: Home River Media / Buvttadeaddji: Kati Eriksen / Čálli: Niki Rasmus / Bagadalli: Niki Rasmus / Juolluduvvon: 370.000 NOK
Stállubojá speallan gaskkalduvvo fáhkka go su áhčči hilbošeapmi dagaha bávkaleami, mii billista su dihtora. Go sus eai leat ruđat ođđa dihtorii, de son lihtuda noaiddiin gávdnandihte ruđa. Mátkkis deaivvadit sii amas Sámi mytologalaš oruhiin ja ártnaiguin.
NOAIDI
Oanehisfilbma / Buvttadanfitnodat: Finnmark Filmproduction / Buvttadeaddji: Espen Larsson ja Johannes Vang / Čálli: Espen Larsson / Bagadalli: Espen Larsson / Juolluduvvon: 350.000 NOK
Girječálli Aslak Poulsen máhccá boares bartiičállit, ii ge dieđe ahte bartta leat huksejuvvon dan nala gokko noaidi Anders Poulsen goddojuvvui 1692:s. Go gránnjá Villum Gundersen ihtá oidnosii, de gáržžiduvvo Aslak dološ vuoiŋŋalaš dáistaleapmái sámiid ja kristtalaš oskku gaskii.
JAGI LÁDDELAŠ
Oanehisfilbma / Buvttadanfitnodat: Home River Media / Buvttadeaddji: Kati Eriksen / Čálli: Aleksi Ahlakorpi / Bagadalli: Aleksi Ahlakorpi / Juolluduvvon: 185.000 NOK
Ahlakorpi ovttasta standup-komihkastis sátneleaikkaid ja oanehis onelineriid sihke guhkit ságaid, main son gieđahallá mátti ja davi, Suoma ja Sámi earuid, guorahallá almmáivuođa ja dien, mo lea eallit sámegielat láddelažžan Sámis.
I DREAM OF MYSELF AT NIGHT
Oanehisfilbma / Buvttadanfitnodat: Irma Bergdahl / Buvttadeaddji: Irma Bergdahl / Co-Buvttadeaddji: Malin Hüber (Herfilm SE) / Čálli: Irma Bergdahl, Maja Palm/ Bagadalli: Irma Bergdahl / Juolluduvvon: 300.000 NOK
Henrik hirpmástuhttá iežas ja buohkaid earáid, go ii mieđit veahkehit jahkásaš miessemearkumiin. Son áiggošii dušše suohtastallat, muhto áššit eai mana nu go lei sávvan.
BUNK BUNK
Oanehisfilbma / Buvttadanfitnodat: Mattima Film AS / Buvttadeaddji: Ane-Martha Hansgård, Laure Dahout (Tiresias Films), Regina Steen Bergman / Co-Buvttadeapmi: Laure Dahout (Tiresias Films) / Čálli: Ane-Martha Hansgård / Bagadalli: Ane-Martha Hansgård / Juolluduvvon: 300.000 NOK
Queer nisu máhccá ruoktot maŋŋá go lea árben amas bunkkara dievva sámi dávviriiid. Hávkaduvvon váivvit, moraš ja ja identitehta doalvu su surrealisttalaš mátkái muittušeapmái, eatnivuhtii ja dološáiggi jaskatvuhtii.
GOAVKUT
Oanehisfilbma / Buvttadanfitnodat: Driva Produktion / Buvttadeaddji: Anna Sunna, Mathias Fjellström (Salmonfox) / Čálli: Mathias Fjällström / Bagadalli: Patricia Fjellgren / Juolluduvvon: 300.000 NOK
6-jahkásaš Áile veallaha seaŋggas iežas lanjas. Son ii sáhte oađđit ja son álgá iežas duhkkorasan Selmain fantaseret maid dáhpáhuvvá su uvssa olggobealde. mii lea goavkut. Áile gullá jiena gievkanis ja son jáhkka ulddat (gádnihat) leat boahtan su váhnemiid sadjái.
BISSEGH – SACRED
Dokumentára / Buvttadanfitnodat: Viehke AS / Producer: Tom Kappfjell / Co-Buvttadeapmi: Ulf Myrvold (Alvelandet Dokumentarproduksjon AS), Per Espen Stoknes (Stoknes Futures As) / Čálli: Leif Stinnerbom / Bagadalli: Ulf Myrvold / Granted: 300.000 NOK
Voarrasit, Tom, lea árvvoštallame galgá go botket jávohisvuođa bassibáikkiid birra, seammás go nuorra, ođđaáigásaš sámi nisu Ramona lea ohcame oahppat eambbo árbevieruid birra. Manahuvvogo boares diehtu agibeaivái? Vai gávdná go son juoidá maid fievrrida viidásit?
Buvttadandoarjaga ulbmil
Doarjaga ulbmil lea sihkkarastit sámegielat filbmaprošeavttaid buoremus vejolaš kvaliteahta ja nannet sámi filbmadahkkiid ja buvttadeddjiid.
ISFI buvttadandoarjaga ohcanáigemearit leat njelljii jagis: guovvamánu 1. beaivi, miessemánu 1. beaivi, čakčamánu 1. beaivi ja juovlamánu 1. beaivi.