Raasten Rastah Filmh Gïelevåhkoe vahkkoloahpa
Almmuhuvvon: 24.10.2024
SÁMI FILBMAFESTIVÁLA PLASSJES
GOLGGOTMÁNU 25.b-27.b
Giellavahkku loahpas lágiduvvo Raasteh Rastah filbmafestivála Plassjes/Rørosas Norgga beale Sámis. Festiválas čájehuvvojit ođđaseamos sámi filmmat bearjadagas golggotmánu 25. beaivvis sotnabeaivái golggotmánu 27. beaivái.
Lea olu mii dáhppáhuvvát, earret eará filbma bargobáddji, filbma iđitborramuš, filbma čájeheamit ja eará doaimmat. Lágiduvvo maid erenoamáš ovda-premiera davvisámegielat dubbemis Rieban ja Njoammil gádjuba vuovddi, ja beassat maid oaidnit pilota-oasáža lulli sámi animašuvnnas Saajven jïh elmien gaske.
Festiválas čájehuvvojit maid ođđaseamos áigeguovdilis filmmat nu go Biru Unjárga —Føkkings Nesseby, Je´vida, ja Stolen, ja dokumentára One with the Whale. Boarrásit geardái leat lulli sámi oanehis filmmat ja feelgood eahket sihke bearjadaga ja lávvordaga.
Geahča olles prográmma dás (DÁR).
Deaivvadan báiki
Nicklas Danielsen, gii lea okta festivála prográmmahábmejeaddjiin ja festivála koordináhtor illuda festiválii.
Raasten Rastah mearkkaša olu lulli sámi servvodahkii. Lea deaivvadanbáiki mánáide, nuoraide ja rávisolbmuide, ja prográmma lea heivehuvvon buohkaide, muitala son.
Filbmabargobáddji
Danielsen illuda maid erenoamážit mánáid filbmabargobáddjái.
Mánát ráhkadit filmmažiid guovtti beaivvis, ja de besset čájehit daid festiválas. Sii leat ovdal beassan UKMii filmmain, ja sis lea álo nu somá.
Lassin čájehuvvojit maid golbma oanehisfilmma maid Sámi joatkkaskuvllaoahppit leat ráhkadan. Dát prošeakta lea ovttasbargu gaskal Filmbussen Trøndelag, Gïelem nastedh, ja HATSK.
Feelgood eahket
Maŋŋá filmmaid beassá searvat feelgood guoimmuhaneahkedii sihke bearjadaga ja lávvordaga.
Dát leat guokte ođđa konseapta maid mii geahččalat: feel-good eahket bearjadaga, gos beassá geahččat boares lulli sámi oanehisfilmmaid. Lávvordaga lea ges muitalusaid eahket.
Lea goalmmát geardi Raasten Rastah filbmafestivála lágiduvvo. Vuosttaš geardi lei 2019:s, dasto 2022:s, ja dál 2024:s. Ovdal leamaš soames filbmaeahkedat Raasten Rastah festivála oktavuođas.
Oasit dán jagi prográmmas lea ovttasbargu gaskal Internášunála Sámi Filbmainstituhtta ja Raasten Rastah.