SÁMI FILMMAT BOAĐI BOAĐI: Erenoamáš geahčastat tv-ráidduide

SÁMI FILMMAT BOAĐI BOAĐI: Erenoamáš geahčastat tv-ráidduide

Internášunála Sámi Filbmainstituhtta bovde doaluide Sámi Filmmat Boađi Boađi Skábmagovat filbmafestiválii. Dán jagi lea mis erenoamáš geahčastat Sámi Tv-ráidduide. 

Maŋimus jagiid lea sámi filbmamuitaleamis leamaš erenoamáš buorre áigodat. Leat ollu ođđa guhkesfilmmat ja dál maiddái ollu ođđa Sámi tv-ráiddu. Ráiddut leat vuoitán ja nominerejuvvon bálkkašumiide filbmaealáhusas, ja maiddá vuvdojuvvon gehččiide olggobealde Sámi.

Makkár strategiijat leat dagahan dán lihkostuvvama? Mo dat hábme filbma- ja tv-ealáhusa – ja makkár váikkuhusaid das leat sámi servodahkii? Ja deháleamos, mo sáhttit láhčit dili ovddosguvlui ahte dát positiivvalaš ovdáneapmi joatkašuvvá boahttevuođasge?

Goas ja gos: Lávvordaga, ođđajagimánu 24 b., 2026, dii. 17:00, Sajos, Inari

ISFI bovde du searvat ságastallamii gos mii loktet ovdán tv-ráidduid “Ciao ráhkis”, “Oro jaska” ja “Heajastallan”. Mii beassat gullat eambbo sis geat leat bargan tv-ráidduin, nu go Ken Are Bongo (Ciao ráhkis), Vegard Bjørsmo ja Silje Burgin Borch (Oro jaska), ja Åse Kathrin Vuolab (Heajastallan). Mii beassat maid gullat eambbo makkár áigumušat álbmotsáddehagain NRK ja Yles leat, Johan Ailo Kalstad (NRK) ja Jarmo Lampela (YLE) bokte.

Ságastallama jođiha ISFI filbmakonsuleanta Siljá Somby.

Sámi filmmat boađi boađi / Sámi films rising lea oassin ISFI barggus nannet Sámi filmma ovdáneami, ja čalmmustahttit hivvodaga, ambišuvnnaid ja dáiddalaš fámu otná Sámi filbma ealáhusas.

Picture from Skábmagovat Sámi Films Rising 2025.