Giehtačálus­stipeanda

ISFI addá doarjaga giehtačállosa ovdánahttimii buot šáŋŋeriin. Doarjjaortnega ulbmil lea sihkkarastit ahte sámi giehtačállosat dollet alimus vejolaš dáiddalaš kvalitehtadási. Mii ohcat giehtačállosiid mat leat auteanttalaččat ja main lea nana sámi kultuvrralaš čanastupmi ja main filmma váldodialoga lea sámegillii. Giehtačállosat main mánát ja nuorat leat ulbmiljoavkun, vuoruhuvvojit erenoamážit.

ISFI áigumuš dáinna doarjagiin lea addit giehtačálliide geat atnet iežaset sápmelažžan dahje leat sámegielagat, vejolašvuođa ráhkadit giehtačállosa mii sáhttá birget nationála ja riikkaidgaskasaš dásis.

• Sámi buvttadanfitnodat, juogo váldo- dahje mielbuvttadeaddjin, man váldoulbmilin lea audiovisuála buvttadeapmi ja mii lea registrerejuvvon Sámis, Norggas dahje EEO-riikkas.
• Giehtačálusstipeanda sáhttá juolluduvvot oasussearvái, dahje eará fitnodagaide mat leat registrerejuvvon ovttadat- ja fitnodatregistarii Norggas dahje eará EEO-riikkas.
• Jus doarjjavuostáváldi lea buvttadeaddji, de son ferte bidjat mielddusin šiehtadusa giehtačállosa čállii(gui)n.

Jus galgá oažžut doarjaga ISFI:s, de ferte sihke ohcci ja prošeakta deavdit ISFI oppalaš eavttuid.

Giehtačálusstipeandda juolludeapmi ii sihkkarastte viidáset doarjaga, muhto lea vejolaš ohcat doarjaga seamma prošektii maŋŋel.

Go ISFI dohkkeha giehtačállosa juolluduvvon doarjaga oktavuođas, de dat ii galgga áddejuvvot ovddalgihtii dohkkeheapmin dahje mieđiheapmin makkárge maŋŋelis buvttadanohcamii.

Jus ISFI addá viidáset doarjaga prošektii, de rehkenastojuvvo juolluduvvon giehtačálusstipeanda oassin ollislaš doarjagis ISFI:s.
Man ollu doarjaga sáhttá ohcat:

• Oanehisfilbma ja oanehis dokumentárafilbma (gitta 40 min.)
  • Giehtačálus sáhttá oažžut doarjaga NOK 50 000 dušše oktii
• Guhkesfilbma ja guhkes dokumentárafilbma
  • Giehtačálus sáhttá oažžut doarjaga gitta NOK 150 000
• TV-ráidu
  • sáhttá ohcat gitta NOK 250 000

Giehtačálusstipeandda sáhttá ohcat máŋgga muttus ja go lea dohkkehuvvon muddu, de sáhttá ohcat nuppes viidáset fievrridit barggu.

ISFI ii fála giehtačálusstipeandda spealuide ja interaktiiva buvttademiide. ISFI čujuha dáid ohcat ovdánahttindoarjaga.

Giehtačálusstipeanddas ii leat ohcanáigemearri ja ohcamat meannuduvvojit dađistaga.