Dubben

Internašunála Sámi Filbmainstituhta (ISFI) ulbmil lea doarjut ja ovddidit sámi filbmabuvttadeami sámegillii. Sámi filbmabuvttademiide lassin lea dubbet filmmaid sámegillii effektiiva vuohki lasihit sámegielat kvalitehtafilmmaid erenoamážit mánáide ja nuoraide. Danne ISFI vuoruha doarjut sámegielat dubbemiid.

Buvttadandoarjaga ohcci ja vuostáiváldi ferte leat sámi buvttadanfitnodat.
Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje jorgaleaddji (jorgaleaddji) atná iežas sápmelažžan dahje lea sámegielat.

Vai sáhttá ohcat dubbendoarjaga ISFIs, gáibiduvvo ahte ohcci lea sámi buvttadeaddji dahje mielbuvttadeaddji. Sámi servodagas lea erenoamáš dárbu nannet sámi filbmabuvttadeami. Dát eaktu galgá sihkkarastit sámi eaiggátvuođa sámi filmmaide ja ovddidit sámi buvttadanfitnodagaid.

Buvttadandoarjja sáhttá juolluduvvot oasussearvái (AS, AB, Oy) dahje ovttaolbmofitnodahkii jus ohcan lea vuollel NOK 300 000.

Leat čuovvovaš gáibádusat prošeavttaide maid ohcet doarjaga:

• Prošeakta galgá ollásit leat sámegillii.
• Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje jorgaleaddji atná iežas sápmelažžan dahje lea sámegielagat.
• Prošeavttat maid ulbmiljoavkun leat mánát ja nuorat vuoruhuvvojit erenoamážit.
• Filmma váldogiellan galgá leat sámegiella.
• ISFI árvvoštallá deavdá go prošeakta gáibádusaid sámi gullevašvuođa ja sámegiela hárrái.

Doaimmat mat fátmmastit mánáid ja nuoraid vuoruhuvvojit.

Dubbendoarjja máksojuvvo dábálaččat guovtti oasis; vuosttaš oassi go doarjjaoažžu čálalaččat lea dohkkehan doarjjalohpádusa, ja nuppi oasi go ISFI lea dohkkehan dorjojuvvon prošeavtta raporterema.

ISFI doarjjalohpádus lea fámus golbma mánu juolludanbeaivvi rájes. Jus doarjjavuostáiváldi ii leat dohkkehan doarjaga eavttuid golmma mánu sisa, de gessojuvvo doarjja ruovttoluotta almmá dieđu haga.

Distribušuvdnadoarjaga ohcamii ii leat áigemearri ja ohcamušat meannuduvvojit dađi mielde.

Áššemeannudanáigi lea dábálaččat guhta vahkku.

Ovttaskasmearrádusaid maid Internašunála Sámi Filbmainstituhtta dahká sáhttá váidit Norgga Kultur- ja dásseárvodepartementii.

Dubbendoarjagiidda eai leat ohcanáigemearit ja dáid sáhttá ohcat dárbbu mielde.

Jus doarjja máksojuvvo guovtti oasis, de fertet áiggebále raporteret dahje ohcat áigemeari maŋiduvvot.

Mildosat mat galget čuovvut raporterema

• Rehketdoallu
  Rehketdoallu galgá čájehit buot goluid juolluduvvon prošeavttas. Jus raporteret mátkestipeandda anu, de galggat rehketdoalu sajis sáddet guittiid mat duođaštit bušehterejuvvon goluid. Borramuš- ja vuodjingolut eai gokčojuvvo.
• Prošeavtta ruhtadeapmi
  Spesifisere ja čilge buot ruhtadeami prošeavttas ja gii prošeavtta ruhtada.
• Prošeaktarehketdoallu
  Gáibiduvvo dohkkehuvvon revisora rehketdoallodárkkisteapmi jus doarjja lea NOK 200 000 dahje eanet. Muđui galgá rehketdoalli vuolláičállán buot rehketdoaluid.

Váilevaš raporteren / Njuolggadusaid rihkkun

Jus doarjaga vuostáiváldi rihkku doarjjanjuolggadusaid dahje ii raportere ruhtageavaheami, de sáhttá dat čuohcit boahttevaš doarjjajuolludemiide. Rihkkun dán oktavuođas rehkenastojuvvo ISFI njuolggadusaid rihkkumin jus doarjja ii geavahuvvo doarjjaeavttuid mielde ja/dahje jus rihkku dahje ii čuovo ISFI mearrádusa mii lea dahkkojuvvon lága ja/dahje láhkaásahusa olis. Rihkkumiid oktavuođas sáhttá ISFI maiddái válljet bidjat johtui čuovvovaš ráŋggáštemiid:

• Bissehit doarjjamáksima guoskevaš prošektii.
• Bissehit doarjjamáksima doarjaga vuostáiváldi eará prošeavttaide.
• Gáibidit ahte olles doarjja dahje oassi doarjagis máksojuvvo ruovttoluotta.
• Mearridit doarjaga vuostáiváldái gitta 3 jagi errenáiggi, go ii juolluduvvo doarjja.
• Jus lea mearkkašahtti rihkkun, de galgá ISFI dakkaviđe bissehit buot doarjjamáksámušaid guoskevaš prošektii.