Giehtačálus­stipeanda

Internašunála Sámi Filbmainstituhtta sáhttá juolludit doarjaga čállit Sámi synopsisa, treatmenta (muitalusa čoahkkaigeasu) ja giehtačállosa. ISFI sáhttá maid doarjut dramaturgalaš veahki.

  • Giehtačálusdoarjaga ulbmil lea sihkkarastit ahte giehtačálus doallá buoremus vejolaš kvalitehtadási. Viidáset galgá dát addit vuođu dan meannudeapmái maid ISFI dahká go árvvoštallá galgágo juolludit viidáset doarjaga, jus ohcet, filbmaprošeavtta ovddideapmái dahje buvttadeapmái.

    ISFI áigumuš dáinna doarjagiin lea ahte sihke hárjánan ja hárjánkeahtes giehtačálus čállit geain lea sámi gullevašvuohta, ožžot vejolašvuođa hábmet giehtačállosa mii bastá gilvalit buvttadanruhtadeamis. Giehtačállosa ovdánahttin galgá čuovvut ISFI ulbmila njuolggadusaid oppalaš oasi vuođul.

  • Ohcci sáhttá leat sápmelaš dahje eará álgoálbmot čálli, bagadalli, buvttadeaddji dahje joavku. Giehtačálusdoarjja sáhttá juolluduvvot ovttaskas čállái dahje bagadallai guhte čállá giehtačállosa, dahje buvttadeaddjái dahje jovkui. Jos doarjaga vuostáváldi lea buvttadeaddji, ferte son buktit ovdán iežas šiehtadusa giehtačállosa čálliin, jos ISFI dan gáibida. Doarjaga vuostáiváldi ferte duođaštit mo ja masa ruhtadeapmi lea geavahuvvon.

    Sápmelaččat fertejit leat guovddáš rollain prošeavttas; nu ahte juogo buvttadeaddji dahje mielbuvttadeaddji lea sápmelaš dahje sámegielat, ja lassin bagadalli dahje giehtačállosa čálli lea sápmelaš dahje sámegielat.

  • Oaččun dihtii doarjaga ISFI:s ferte ohcci ja prošeakta deavdit obbalaš doarjjagáibádusaid, ja daid gáibádusaid mat gukset vissis prošektii. ISFI árvvoštallá prošeavtta oppalaččat prošeavtta dáiddalaš hámi vuođul, ja maid geatnegasvuođaid vuođul maid dát njuolggadusat bidjet.

    Doarjjajuolludeapmi lea čátnon sámi kultuvrii ja gillii. Čuovvovaš gáibádusat leat prošeavttaide mat ohcet doarjaga:

    Prošeakta galgá aivve sámegillii hábmejuvvot.

    Prošeavtta guovddáš váldodoaimmain galgá leat sápmelaš dahje sámegielat, nu ahte álo juogo buvttadeaddji dahje mielbuvttadeaddji lea sápmelaš dahje sámegielat, ja lassin bagadalli dahje giehtačállosa čálli galgá leat sápmelaš dahje sámegielat.

    Prošeavttas galgá leat sámi fáddá.

    Prošeavttat main ulbmiljoavku leat mánát ja nuorat, vuoruhuvvojit erenoamážit.

    Filmma váldogiella galgá leat sámegiella.

    ISFI guorahallá oppalaččat konkrehta árvvošteami vuođul deavdágo prošeakta sámi gullevašvuođa gáibádusa.

  • Ovdánahttindoarjja máksojuvvo dábálaččat guovtti oasis; bealli dan maŋŋá go doarjjaoažžu čálalaččat lea dohkkehan doarjjalohpádusa, ja nuppi beali doarjagis ISFI máksá dan maŋŋá go lea dohkkehan dorjojuvvon prošeavttaraporterema.

    Doarjjalohpádus ovdánahttimii ii mielddisbuvtte lohpádusa viidáset ruhtadoarjagii ovddidit buvttadeami, muhto lea vejolaš maŋŋá ohcat doarjaga seammá prošektii.

    Jus ISFI doarju prošeavtta viidáset, de gehččojuvvo juolluduvvon ovdánahttindoarjja oassin dan ollislaš doarjagis, maid ii leat geatnegas máksit ruovttoluotta.

    ISFI doarjjalohpádus gusto golbma mánu dan rájes go doarjjalohpádus addojuvvo. Doarjjalohpádus gahččá eret almmá eambbo dieđáhusa.

  • Giehtačálusstipeanddaide eai leat ohcanáigmearit ja dáid sáhttá ohcat dárbbu mielde.