Giehtačálus­stipeanda

Internašunála Sámi Filbmainstituhtta sáhttá juolludit doarjaga čállit Sámi synopsisa, treatmenta (muitalusa čoahkkaigeasu) ja giehtačállosa. ISFI sáhttá maid doarjut dramaturgalaš veahki.

  • Giehtačálusdoarjaga ulbmil lea sihkkarastit ahte giehtačálus doallá buoremus vejolaš kvalitehtadási. Viidáseappot galgá dát addit vuođu meannudeapmái maid ISFI dahká go árvvoštallá galgágo juolludit viidáset doarjaga, jus ohcet, filbmaprošeavtta ovddideapmái dahje buvttadeapmái.

    ISFI ulbmil dáinna doarjagiin lea ahte sihke hárjánan ja ođđa giehtačálusčállit geain lea sámi gullevašvuohta, ožžot vejolašvuođa hábmet giehtačállosa mii bastá gilvalit buvttadanruhtadeamis. Giehtačállosa ovdánahttin galgá čuovvut ISFI ulbmila njuolggadusaid oppalaš oasi vuođul.

  • Ohcci galgá leat sápmelaš čálli, bagadalli, buvttadeaddji dahje joavku.

    Giehtačálusdoarjja sáhttá juolluduvvot ovttaskas čállái dahje bagadallái guhte čállá giehtačállosa, dahje buvttadeaddjái dahje jovkui. Jos doarjaga vuostáváldi lea buvttadeaddji, ferte son buktit ovdán iežas šiehtadusa giehtačállosa čálliin, jos ISFI dan gáibida. Doarjaga vuostáiváldi ferte duođaštit movt ja masa ruhtadeapmi lea geavahuvvon.

    Prošeavtta guovddáš rollain fertejit leat olbmot geat atnet iežaset sápmelažžan dahje leat sámegielagat. Guovddáš rollat leat buvttadeaddji dahje mielbuvttadeaddji, ja bagadalli dahje giehtačállosa čálli.

     

  • ISFI sáhttá juolludit doarjaga jus ohcci ja prošeakta devdet obbalaš doarjjagáibádusaid, ja daid gáibádusaid mat gusket vissis prošeavttaide. ISFI árvvoštallá prošeavtta oppalaččat prošeavtta dáiddalaš hámi vuođul, ja maid eavttuid vuođul maid dát njuolggadusat bidjet.

    Doarjja lea čadnon sámi kultuvrii ja gillii. Leat čuovvovaš gáibádusat prošeavttaide maid ohcet doarjaga:

    • Prošeakta galgá ollásit leat sámegillii.
    • Prošeavtta guovddáš váldodoaimmain galget leat sápmelaččat, nu ahte buvttadeaddji dahje mielbuvttadeaddji, ja bagadalli dahje giehtačállosa čálli atná iežas sápmelažžan dahje lea sámegielat.
    • Prošeavttas galgá leat sámi fáddá/temá.
    • Prošeavttat maid ulbmiljoavkun leat mánát ja nuorat vuoruhuvvojit erenoamážit.
    • Filmma váldogiellan galgá leat sámegiella.
  • Giehtačálusstipeanda máksojuvvo dábálaččat guovtti oasis; bealli go doarjjaoažžu čálalaččat lea dohkkehan doarjjalohpádusa, ja nuppi beali doarjagis máksá ISFI go lea dohkkehan dorjojuvvon prošeavtta raporterema.

    Doarjjalohpádus giehtačállosa ovdánahttimii ii mielddisbuvtte lohpádusa viidáset ruhtadoarjagii buvttadeapmái, muhto lea vejolaš maŋŋel ohcat doarjaga seamma prošektii.

    Jus ISFI doarju prošeavtta viidáseappot, de adnojuvvo juolluduvvon giehtačálusstipeanda oassin ollislaš doarjagis.

    ISFI doarjjalohpádus lea fámus golbma mánu juolludanbeaivvi rájes. Jus doarjjavuostáiváldi ii leat dohkkehan doarjaga eavttuid golmma mánu sisa, de gessojuvvo doarjja ruovttoluotta almmá dieđu haga.

    Man olu doarjaga sáhttá ohcat:

     

    • Oanehisfilbma
      o Sáhttá ohcat okte gitta NOK 50 000
    •  Guhkesfilbma
      o Sáhttá ohcat gitta NOK 150 000 juohke háve
    • TV-ráidu
      o Sáhttá ohcat gitta NOK 250 000 juohke háve

     

    Giehtačálusstipeanddaide ii leat ohcanáigemearri ja ohcamat meannuduvvojit dađi mielde.

    Ovttaskasmearrádusaid maid Internašunála Sámi Filbmainstituhtta dahká sáhttá váidit Norgga Kultur- ja dásseárvodepartementii.

    Áššemeannudanáigi lea guhtta vahkku.

  • Giehtačálusstipeanddaide eai leat ohcanáigmearit ja dáid sáhttá ohcat dárbbu mielde.

  • Jus doarjja máksojuvvo guovtti oasis, de fertet áiggebále raporteret dahje ohcat áigemeari maŋiduvvot.

    Raporta sáddejuvvo e-poasttii rapport@isfi.no ja galgá čujuhuvvot doarjaga referánsanummarii.

    Mildosat mat galget čuovvut raporterema

     

    • Rehketdoallu
      Rehketdoallu galgá čájehit buot goluid juolluduvvon prošeavttas. Jus raporteret mátkestipeandda anu, de galggat rehketdoalu sajis sáddet guittiid mat duođaštit bušehterejuvvon goluid. Borramuš- ja vuodjingolut eai gokčojuvvo.
    • Prošeavtta ruhtadeapmi
      Spesifisere ja čilge buot ruhtadeami prošeavttas ja gii prošeavtta ruhtada.
    • Prošeaktarehketdoallu
      Gáibiduvvo dohkkehuvvon revisora rehketdoallodárkkisteapmi jus doarjja lea NOK 200 000 dahje eanet. Muđui galgá rehketdoalli vuolláičállán buot rehketdoaluid.
    • Ovdánahttindoarjja
      Ovdánahttindoarjaga raporterema oktavuođas fertet sáddet vejolaš pilohta, scripta ja eará materiála mii lea gárvvis prošeavtta čađaheamis.
    • Giehtačálusstipeanda
      Jus leat ožžon stipeandda/doarjaga giehtačállosa ovdánahttimii, de galggat sáddet gárvves giehtačállosa ISFIi. Giehtačálusstipeandda raporteremis ii gáibiduvvo rehketdoallu ii ge čilgehus prošeavtta ruhtadeami hárrái. Mii fuomášuhttit ahte mii eat gease vearu giehtačálusstipeanddas, ja ahte don fertet ieš dieđihit stipeandda vearroeiseválddiide.

     

    Váilevaš raporteren / Njuolggadusaid rihkkun

    Jus doarjaga vuostáiváldi rihkku doarjjanjuolggadusaid dahje ii raportere ruhtageavaheami, de sáhttá dat čuohcit boahttevaš doarjjajuolludemiide. Rihkkun dán oktavuođas rehkenastojuvvo ISFI njuolggadusaid rihkkumin jus doarjja ii geavahuvvo doarjjaeavttuid mielde ja/dahje jus rihkku dahje ii čuovo ISFI mearrádusa mii lea dahkkojuvvon lága ja/dahje láhkaásahusa olis. Rihkkumiid oktavuođas sáhttá ISFI maiddái válljet bidjat johtui čuovvovaš ráŋggáštemiid:

     

    • Bissehit doarjjamáksima guoskevaš prošektii.
    • Bissehit doarjjamáksima doarjaga vuostáiváldi eará prošeavttaide.
    • Gáibidit ahte olles doarjja dahje oassi doarjagis máksojuvvo ruovttoluotta.
    • Mearridit doarjaga vuostáiváldái gitta 3 jagi errenáiggi, go ii juolluduvvo doarjja.
    • Jus lea mearkkašahtti rihkkun, de galgá ISFI dakkaviđe bissehit buot doarjjamáksámušaid guoskevaš prošektii.