Ainbo – Amazonasa várjaleaddji vuosttaščájáhus

Bearjadaga miessemánu 21. beaivvi lea Ainbo – Amazonasa várjaleaddji vuosttaščájáhus Norggas. Duottar Studio lea dubben filmma davvisámegillii. Geahča filmma davvisámegiel trailera dás.

Ainbo – Amazonasa várjaleaddji (2021) guhkesfilmma lea buvttadan Tunche film ja Cool Beans ja sii leat ovttasbargan Shipibo álgoálbmogiin Amazonasis, go filmma muitalus lea sin kultuvrra vuođul ráhkaduvvon. Sámegillii dubben lea ovttasbargu Another World Enternaimnetain ja Star Mediain.

– Min mielas dát lea nu fiinna filbma, mii heive sámi gehččiide, go lea nuorra álgoálbmot nieidda birra, guhte ferte vuosttildit ruvkefitnodaga mii lea ohcame golli sin ruvttuguovllus. Odne gávdnojit nu unná filmmat sámegillii, erenomaážit mánáide ja nuoraide, ja go eanas sámegielat leat ON áitojuvvon gielaid listtus, de min mielas lea hui ge deahálaš ahte bohtet eambbo filmmat iežamet gillii ja maiddái dubbejuvvon filmmat, dadjá ISFI jođiheaddji Anne Lajla Utsi.

Ingá Ánne Márjá Bongo neaktá Ainbo davvisámegielat veršuvnnas.

Davvisámegielat Ainbo jietnaneavttárat: Ingá Ánne Márjá Bongo (Ainbo), Ella Susanne Eriksen (Zumi), Nils Olaf Eira Hætta (Dillo), Egil Keskitalo (Vaca), Áslat Mahtte Gaup (Atok), Mari Boine (Chuni), Elle Márjá Eira (Lizeni), Kai Somby (Yakuruna/Will/Dewitt), John Steinar Baal (Pelejo), Ánte Mihkkal Gaup (Huarinka), Siljá Somby (Motelo Mama), Svein Egil Oskal (Conibo).

Davvisámegielat Ainbo boahtá kinoide Norggas miessemánu 21. beaivvi ja maŋŋel go filbma lea johtán kinoin, de boahtá maiddái www.sapmifilm.com streamen bálvalussii.

Norgga Sámediggi lea dorjon filmma dubbema.