Árktalaš Álgoálbmot Filbmafoandda ođđa Verddet

Nikolaj Coster-Waldau, Nukâka Coster-Waldau ja Baltasar Kormákur čohkkejit searaideaset ovdánahttin dihtii Árktalaš álgoálbmot filbmadahkkiid ođđa Buvttadan- ja Ovdánahttinfoandda.

Nuuk, Ruonáeana – The Arctic Indigenous Film Fund dahje Árktalaš Álgoálbmot Filbmafoanda (AIFF) almmuha dál iluin ahte beakkán filbmadahkkit ja neavttárat Nikolaj Coster-Waldau (GOT, SHOT CALLER, AGAINST THE ICE, GUOVDAGEAINNU STUIMMIT), Nukâka Coster-Waldau (ANORI, FORBRYTELSEN, THIN ICE) ja Baltasar Kormákur (EVEREST, ADRIFT, KATLA) leat foandda vuosttaš ambassadevrrat – Verddet.

Foandda verdden áigot sii leat veahkkin ovddideamin ja dovddusin dahkamin AIFF filbma- ja TV-industriijas ja vejolaš ruhtadeadjiid gaskkas iežaset ruovttuguovlluin ja máilmmiviidosaččat. Árktalaš Álgoálbmot Filbmafoanda – man Internašunála Sámi Filbmainstituhtta lea ásahan – lea ođđa foanda, man áigumuš lea ovdánahttit álgoálbmot filbmadahkkiid Árktalaš guovlluin ja doarjut sin filmmaid, TV-ráidduid ja eará buvttademiid.

Govas Emile Hertling Peronard, Anne Lajla Utsi, Baltasar Kormákur, Nikolaj Coster-Waldau and Pipaluk K. Jørgensen. Govven Emil Stach

Álgoálbmogiid jietna galgá gullot

– Mii leat ilus ja rámis go beassat doarjut Árktalaš Álgoálbmot Filbmafoandda, dadjet golbma dáiddolaš ja beakkán ambassadevrra oktasaš cealkámušas.

– Mis buohkain leat nanu čanastagat Árktalaš guovlluide sihke persovnnalaččat ja min barggu oktavuođas ja mii diehtit man olu čehppodat dáppe gávdno. Álgoálbmogiid jietna galgá gullot ja Árktalaš guovlluin leat mávssolaš, hui dehálaš ja fámolaš muitalusat maid máilbmi ii leat vuos ovdal beassan gullat ja oaidnit. Mii sávvat ahte AIFF lihkosnuvvá iežas áigumušaiguin doarjut álgoálbmot filbmadahkkiid, nu ahte nagoda leat mielde gokčamin váilevaš ruhtadeami dáid dáiddáriid prošeavttain, dadjet sii.

AIFF Verdde Nikolaj Coster-Waldau. Govven Emil Stach

Foanda lea dál álgán háhkat internašunála ovttasbargoguimmiid ja ruhtadeddjiid. Dálá ovttasbarggu bokte mas leat mielde Internašunála Sámi Filbmainstituhtta, Canada Media Fund ja Telefilm Canada, lea AIFF aiddo juolludan vuosttaš ovdánahttindoarjagiid muhtin filbmamáilmmi gelddoleamos ođđa bagadalliide. Sii leat:

• Kelvin Redvers (Kanáda, ICE ROAD)
• Pipaluk K. Jørgensen (Ruonáeana, THIS ROAD OF MINE)
• Marja Bål Nango (Norga, I LOVE MY GUOĐOHEADDJI)
• Eduard Novikov (Sakha Republic, AT THE END OF THE WORLD)
• Nyla Innuksuk (Kanáda, SLASH/BACK)

Dáid prošeavttaid lassin doarju AIFF maid ARCTIC CHILLS balddonasfilbmačoakkáldaga.

Ilus ovttasbarggu geažil

– Árktalaš guovlluid álgoálbmot muitalusat sáhttet čalmmustahttit ja movttidahttit máilmmi jurddašit ceavzilis ovdáneami boahtteáiggis, dadjá Internašunála Sámi Filbmainstituhta direktevra Anne Lajla Utsi.

– Min muitalusaid bokte sáhttet studioide ja sáttamediaide rahpasit mearehis stuorra vejolašvuođat, seammás go geahččit miehtá máilmmi besset oaidnit gelddolaš álgoálbmot muitalusaid. Mii leat hui ilus go beassat ovttasbargat Nikolajain, Nukâkain, and Baltasarain ja joatkit min dehálaš bargguin ovdánahttit álgoálbmot muitalusaid ja doarjut álgoálbmot filbmadahkkiid. Lea nu olu vuordimis, lohká Utsi.