ÁVVUT SÁMI ÁLBMOTBEAIVVI FILMMAIGUIN!
Almmuhuvvon: 01.02.2024
ÁVVUT SÁMI ÁLBMOTBEAIVVI FILMMAIGUIN!
Dál beasat oaidnit ođđa sámi guhkesfilmmaid kinoin. Seammás leat ollosat geat lágidit filbmačájáhusaid Sámi álbmotbeaivvi oktavuođas. Muhto lea maid vejolaš ruovttus geahččat sámi filmmaid Skábmagovaid online festivála bokte ja min streamen siiddu bokte Sápmifilm.
SÁMI FILMMAT KINOIN
Dá leat muhtin dain sámi filmmain mat dál jorret kinoin dál.
Iskka du báikkálaš kinos lea go biddjon čájáhusat. Jus eai leat almmuhan kinočájáhusa, bivdde sin dahkat dan.
JE´VIDA
100 min | 12+ | Skolt Sámi
Vuosttaš guhkesfilbma nuortalašgillii.
Iida, vuorrasit nuortalašnisson, lea jorgalan sealggis iežas kultuvrii bággosuomaiduhttima geažil. Go son máhccá gurret mánnávuođaruovttu, son gártá gieđahallat eallima bákčasiid ja mearrádusaid maid lea dáhkkán. Filbma suokkarda álgoálbmogiid dili Suomas, golmma áigodagas maŋŋá nuppi máilmmisoađi.
Oidno kinoin ruoŧas ja norggas guovvamánu 2. beaivvi rájes.
EALLOGIERDU – THE TUNDRA WITHIN ME
95 min | 12+ | Norther Sámi
Vuosttaš sámi ráhkisvuođa guhkesfilbma. Dáiddár Lena máhccá ruovttubáikái iežas bártnážiin. Son áigu dutkat sohkabeliid iežas ođđa dáiddaprošektii. Son deaivvada boazosápmelaččain Máhtiin ja soai ráhkásnuvvaba badjeloivviid. Gáren, guhte lea siidaeamit ja Máhte eadni, vuosttalda ovttastallama. Mearrádus maid Lena dagai nuorran muosehuhttá su ja son ferte dainna deaividit seammás go áiggošii ráhkistuvvot ja dohkkehuvvot.
Oidno kinoin norggas guovvamánu 9. beaivvi rájes.
JUŊGELVEAHKA – JOHTÁ BIRRA MÁILMMI
88 min | 7+ | Northern Sámi
Gelddolaš ja actionvuđot animašuvdnafilbma mas lea vaikko man olu leaktu, leaika ja somás sivdnádusat. Fiinna guoimmuheapmi olles bearrašii.
Duottar Studio lea dubben “Jungle Bunch World Tour” davvisámegillii.
Oidno sámegillii Norgga ja Ruoŧa kinoin guovvamánu 6. beaivvi rájes. Suoma bealde ilbmá filbma njukčamánus.
BOVTTÁŠVÁRRI – LÁHPPON MONNI
80 min | All ages | Northern Sámi
Bovttážat Ena ja Baba orruba ráfálaš sullos guhkkin mearas. Ovtta geasi bohtet amas guossit, lottážat mat leat báhtaran davás dálkkádat rievdademiid dihte. Ena, Baba ja eará báikkálaččat ožžot ođđa ustibiid, muhto máiddái ođđa hástalusaid. Erenoamáš gelddolaš šaddá go monni jávká. Nagodit go lottážat gávdnat moni ovdal dálkkáska?
Oidno sámegillii Ruoŧa kinoin guovvamánu 6. beaivvi rájes.
MÁHCCAN – HOMECOMING
76 min | Documentary | Northern Sámi
Museat máilmmis leat maŋimuš jagiid suokkardallagoahtán kolonialisttalaš noađiset ja eamiálbmogiin dolvojuvvon dávviriid máhcaheami. Suoma álbmotmusea čájehii repatriašuvnna málle ja máhcahii badjel 2000 sápmelaččain dolvojuvvon dávvira Sámemusea Siidii. Olu leat goittotge ain máilmmis, čihkosis museaid kealláriin. Mátki dávviriid luottaid guorramin birra Eurohpá lea seammás mátki sápmelaččaid traumáhtalaš vássán áigái ja gieđahalakeahtes morrašiid lusa.
Min rávdnjensiiddu bokte sáhtát geahččat sámi ja eará álgoálbmot oanehis-, dokumentára- ja guhkesfilmmaid. Lea heivehuvvon sihke priváhta geavaheapmái ja almmolaš ásahusaide. Geavaheaddji bokte, mii máksá 59,- mánnui, beasat válljet daid badjelaš 100 filmma gaska mat mis leat min siiddus. Muhtin filmmat ferte láigohit sierra.
Jus háliidat nuvttá čájáhusa lágidit dahje oahpahusas čájehit filmma, sáhtát dahkat dan Sápmifilm bokte. Eará lágidemiide ferte sierra šiehtadus. Loga dan birra vuollelis.
BOVTTÁŠVÁRRI – LÁHPPON MONNI
Oidno Sápmifilmas guovvamánu 6. beaivvi rájes. Fuom! Lea dušše oaidnimis norggabealde, muhto almmuhuvvo suoma ja ruoŧa beallai fargga.
Ii go leat kino du ruovttubáikkis, dahje háliidat go čájehit sámi filmmaid lágidemiid oktavuođas?
Mii fállát filmma Je´vida ja Bovttášvárri sámi giellaguovddážiidda, skuvllaide ja earáide geat háliidit lágidit filbmačájáhusaid gos ii leat kino. Mii sáhtti maiddái veahkkin čujuhit geaiguin galgá váldit oktavuođa jus háliida eará filmmaid čájehit.