Golbma amandaevttohusa Eallogierdui

Golbma Amandaevttohusa Eallogierdui

Guhkesfilbma Eallogierdu maid Sara Margethe Oskal lea bagadallan lea nominerejuvvon golmma kategoriijai Norgga Amandabálkášumis. Risten Anine Gaup evttohuvvo buoremus váldorollan, Biret Anne O. Kemi evttohuvvo buoremus veahkkerollii, ja Anne Margarteha Oskal evttohuvvo buoremus bivttashábmemis.

Nominašuvnnat čájehit ahte min ovttasbargu doallá alla dási ja lean nu rámis singuin geat leat nominerejuvvon. Lean ilus go Risten Anine ja Biret Anne leaba beassan neaktit mánggabealat karakteraid ja dan soai duođaige dahkaba hui bures, dadjá čálli ja bagadalli Sara Margrethe Oskal.

Ja lean hui ilus maid go atnet arvvus min váljjejumi ahte geavahit aivve adnonbiktasiid kostyman. Ja Anne Marge lea ovttasráđiid neavttáriiguin bargan hui buori barggu bidjat daid nu vuohkkasit oktii. Hui ollu lihkku buohkaide, dadjá bagadalli ja čálli Sara Margrethe Oskal.

Risten Anine Kvernmo Gaup dadjá ahte nominašuvdna movttidahttá joatktit neaktimin.

Dat lea hui somá ahte sámi filbma fuomášuvvo ja oažžu beroštumi. Anán árvvus ahte lean nominerejuvvon, dat addá movttá ja áŋgirvuođa joatkit neaktinbargguiguin. Ja sávvamis bohtet eambbo vejolašvuođat neaktit filmmain boahtteáiggis!

Amanda bálkášumi evttoheapmi lea dehálaš sámi filbmasuorgái muitala Internašunála Sámi Filbmainstituhta direktevrra Anne Lajla Utsi.

– Amanda bálkkašumi evttoheapmi mearkkaša erenomáš olu evttohasaide go dát gutnejahttá sin buori barggu. Dákkár nominašuvdna čájeha ahte Sámi filmmat dollet allá dási ja man deahálaš sadji sámi filmmain dál lea maiddái Norgga filbmasuorggis, dadjá Internašunála Sámi Filbmainstituhta direktevrra Anne Lajla Utsi.

Eallogierdu čájehuvvui vuosttaš gearddi Toronto International Filbma Festiválas čavčča 2023. Filmma Norgga premiere lei Tromsø Filbma Festiválas 2024. Dán jagi joatká filmma filbmafestivála mátki meahttá máilmmi, ja lea maid čájehuvvon earet eará Sidney Film Festival ja Santa Barbara International Film Festival.

 

---

Ellogierdu – The Tundra Within Me

Lena lea orron máŋga jagi Oslos ja máhccá ruovttoluotta Sápmái iežas bártnážiin dutkat sohkabeliid ođđa dáiddaprošektii. Doppe son deaivvada ja ráhkásnuvvá boazosápmelažžii Máhttii. Gáren, guhte lea siiddaeamit ja Máhte eadni, vuostálastá ovttastallama. Seammás rahčá Lena ja váivahuvvá mearrádusain maid dagai nuorran. Son ferte gávnnahit sáhttá go goassege su ja Máhte eallimiid ovttastahttit.

Neavttárat: Risten Anine Gaup, Nils Ailu Kemi , Elias Ánte Pilutaq Gaup Lennert, Anitta Katriina Suikkari, Berit Anne O. Kemi, Anders Isak Oskal, John Ante Oskal, Aslat Mahtte Gaup, Inga Marja Utsi, Ingá Márjá Sarre, Sverre Porsanger,, Egil Keskitalo, Ebba Lovise Joks, Mikkel Pulk.
Bagadalli: Sara Margrethe Oskal
Čálli: Sara Margrethe Oskal
Buvttadeaddji: Mona Johanne Hoel for Freedom From Fear Stories
Govvejeaddji: Anders Hoft, FNF
Čuohppi: Anna Løvlund
Bivttashábmen: Anna Margaretha Oskal
Musihkka hábmen: Ville Langfeldt, Jakop Janssønn
Jietna hábmen: Håkon Lammetun, Jakob Beckmann
Distributevrra: Norsk Filmdistribusjon

---

Eambo Amanda bálkkašumi birra

Amanda bálkkašupmi lea Norgga bajimus filbmabálkkašupmi. Leat oktiibuot 21 iešguđet Amandabálkášumi suorggi, ja juohke suorggis leat vihtta evttohasa. Amandabálkášumit juhkkojuvvo bearjadaga borgemánu 23. beaivvi Haugesunddas Norggas. Amanda lea oassin Norgga Internašunála Filbma Festiválas, mii lea borgemánu 17.b – 23. beaivái 2024. Filmmat mat sáhttet evttohuvvot Amandai galget leat čájehuvvon kinoin Norggas gaskkal suoidnemánu 1. beaivvi 2023 gitta geassemánu 30. beaivvi 2024. Amanda bálkkašumi evttohusat almmuhuvvojedje preassakonferánssas Oslos geassemánu 19. beaivvi 2024. The Amanda Awards ceremony will be broadcast on NRK (Norwegian Broadcasting Corporation).

ISFI lea ruhtadan ja dorjon Eallogierdu filmma. Internašunála Sámi Filbmainstituhtta galgá nannet sámi filbmabuvttadeami ja loktet gelbbolašvuođa ja ekonomalaš vejolašvuođaid ovdánahttit, buvttadit ja čájehit sámegielat filmmaid.