Guhtta ođđa sámi buvttadeami ožžot doarjaga
Almmuhuvvon: 18.12.2023
ISFI juolluda 1,1 millijuvnna NOK buvttadandoarjjaga
In My Hand © Paranord Film
Vihtta oanehis filmma ja okta dubben ožžot dán vuoro buvttadandoarjaga. Oktiibuot juolluduvvo 1,14 millijovnna NOK dán jagi maŋimuš ohcanvuorus:
IN MY HAND
Árran360 oanehis filbma / Buvttadanfitnodat: Paranord Film / Čálli: Liselotte Wajstedt / Bagadalli: Liselotte Wajstedt og Marja Helander/ Juolluduvvon: 200.000 NOK
In My Hand lea duohta muitalus, muitaluvvon Niillas Sombys. Son guorahallá peršuvnnálaš ja historjjálaš dáistalemiid maid sápmelaččat vásihit. Filmmas vásihat sihke giddagasa, vuostáldeami ja imašlaš deaivvademiid, ja bovde oahppásmuvvat erenoamáš albmá mátkin. Filmma garra ávžžuhus lea maid seailluhit luonddu.
BIEGGA BIEGGÁ
Oanehis dáiddalaš filbma / Buvttadanfitnodat: Suomenrinne Lada / Čállit: Jenni Laiti ja Lada Suomenrinne / Bagadallit: Jenni Laiti ja Lada Suomenrinne / Juolluduvvon: 120.000 NOK
Sii njealastit min jogaid, ja leagit rivdet moraš gatnjalin. Lihkká leat sivdnádusat geat čohkkejit morraša mátki, go guddet bávččagan muoraid ja buot eallima sivdnádusaid. Sin noađis leat árvvut máilmmis mii manná lohppi, ja sii gávdnet bálgá rahpaseapmái gos vuosttaš muohta muohttá. Biegga bieggá ja ofelastá utopiijai, ja hástala leahkima gažaldagain.
OVIAS 2
Árran360 oanehis filbma / Buvttadanfitnodat: Ann Film / Čálli: Ann Holmgren Aurebekk / Bagadalli: Ann Holmgren Aurebekk / Juolluduvvon: 200.000 NOK
OVIAS joatkašupmi, niehkomáilmmi niehkomáilbmi.
DUIDDO
Árran360 oanehisfilbma / Buvttadanfitnodat: Rein Film / Čálli: Siljá Somby / Bagadalli: Siljá Somby / Juolluduvvon: 200.000 NOK
Duiddo mii deaivvadat Rássegálduin. Su myhtálaš leahkin čájeha vássán áiggiid holistálaš jurddašeamis olbmo ja luonddu čanastumis.
PCA-TV 270
Árran360 oanehisfilbma / Buvttadanfitnodat: Rein Film / Čálli: Ken Are Bongo / Bagadalli: Ken Are Bongo / Juolluduvvon: 200.000 NOK
PCA-TV 270 iská lagabui Mercedes Sprinter arkitektuvrra ja fámuid. Justa nu go biilla ja TV-ráidu, dát 270 filbma lea maid erenoamáš dáiddalaš vásáhus.
PUFFIN ROCK : BOVTTÁŠVÁRRI
Dubben / Buvttadanfitnodat: Duottar Studio AS / Bagadalli: Morten Pettersen / Jorgaleaddji: Berit Magrethe Oskal / Juolluduvvon: 320.000 NOK
Bovttážat Ena ja Baba orruba ráfálaš sullos guhkkin mearas. Ovtta geasi bohtet amas guossit, lottážat mat leat báhtaran davás dálkkádat rievdademiid dihte. Ena, Baba ja eará báikkálaččat ožžot ođđa ustibiid, muhto máiddái ođđa hástalusaid. Erenoamáš gelddolaš šaddá go monni jávká. Nagodit go lottážat gávdnat moni ovdal dálkkáska?
Buvttadandoarja ulbmil
Doarjaga ulbmil lea sihkkarastit sámegielat filbmaprošeavttaid buoremus vejolaš kvaliteahta ja nannet sámi filbmadahkkiid ja buvttadeddjiid.
ISFI buvttadandoarjaga ohcanáigemearit leat njelljii jagis: guovvamánu 1. beaivi, miessemánu 1. beaivi, čakčamánu 1. beaivi ja juovlamánu 1. beaivi.