Buvttadan­doarjja

Internašunála Sámi Filbmainstituhta (ISFI) ulbmil lea bisuhit ja ovddidit sámi filbmabuvttadeami. ISFI áigu olahit dan earret eará dainna ahte juolluda doarjagiid filmmaid ovdánahttimii ja buvttadeapmái, buot šáŋŋeriin ja maiddái eará formáhtain.

Doarjja addojuvvo váikkuhan dihte dihtomielalašvuođa Sámi filmma hárrái ja nannen dihte fágamáhtolašvuođa Sámi filmma birra sihke álbmoga ja filbmabargiid gaskkas.

ISFI galgá ovddidit álgoálbmotfilmmaid ja ovttasbarggu iešguđet álgoálbmotfilbmabirrasiid gaskkas máilmmis. Sámi filmma ovddideapmi ferte vuosttažettiin dahkkojuvvot kultuvrralaš konteavstta ja árvvuid vuođul, ii ge sápmelaččaid gullevašvuođa vuođul stáhtaide. Sámegiella lea deháleamos eaktu man ISFI deattuha go árvvoštallá mii sámi filbma lea. Mihttun lea sihkkarastit sámi filbmagehččiide buriid filbmafálaldagaid iežaset gillii, iežaset kultuvrra vuođul.

Doaimmat mat fátmmastit mánáid ja nuoraid vuoruhuvvojit.

Buvttadandoarjaga ohcci ja vuostáiváldi ferte leat sámi buvttadanfitnodat.

Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje giehtačállosa čálli atná iežas sápmelažžan dahje lea sámegielat.

Vai sáhttá ohcat buvttadandoarjaga ISFIs, gáibiduvvo ahte ohcci lea sámi buvttadeaddji dahje mielbuvttadeaddji. Sámi servodagas lea erenoamáš dárbu nannet sámi filbmabuvttadeami. Dát eaktu galgá sihkkarastit sámi eaiggátvuođa sámi filmmaide ja ovddidit sámi buvttadanfitnodagaid.

Buvttadandoarjja sáhttá juolluduvvot oasussearvái (AS, AB, Oy) dahje ovttaolbmofitnodahkii jus ohcan lea vuollel NOK 300 000.

Vai sáhttá oažžut doarjaga ISFIs fertejit ohcci ja prošeakta deavdit ISFI ohcaneavttuid. ISFI árvvoštallá prošeavtta oppalaččat prošeavtta dáiddalaš kvalitehta vuođul, ja eavttuid vuođul maid dát njuolggadusat bidjet.

Doarjja lea čadnon sámi kultuvrii ja gillii. Leat čuovvovaš gáibádusat prošeavttaide maid ohcet doarjaga:

• Prošeakta galgá ollásit leat sámegillii.
• Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje giehtačállosa čálli atná iežas sápmelažžan dahje lea sámegielat.
• Prošeavttas galgá leat sámi fáddá/temá.
• Prošeavttat maid ulbmiljoavkun leat mánát ja nuorat vuoruhuvvojit erenoamážit.
• Filmma váldogiellan galgá leat sámegiella.
• ISFI árvvoštallá deavdá go prošeakta gáibádusaid sámi gullevašvuođa ja sámegiela hárrái.

Buvttadandoarjja ISFIs lea almmolaš doarjja.

Buvttadandoarjja máksojuvvo dábálaččat guovtti oasis; 75 % go doarjjaoažžu čálalaččat lea dohkkehan doarjjalohpádusa, ja 25 % doarjagis máksá ISFI go lea dohkkehan dorjojuvvon prošeavtta raporterema.

ISFI doarjjalohpádus lea fámus golbma mánu juolludanbeaivvi rájes. Jus doarjjavuostáiváldi ii leat dohkkehan doarjaga eavttuid golmma mánu sisa, de gessojuvvo doarjja ruovttoluotta almmá dieđu haga.

Čuovvovaš dieđut galget boahtit ovdan buvttadandoarjaga ohcamis:

• Duođaštus dasa ahte ohccis lea ovttaolbmofitnodat dahje eará lágán organisašuvdna.
• Buvttadanfitnodaga CV, namat ja CV čuovvovaš rollain: váldobuvttadeaddji, giehtačálusčálli ja bagadalli.
• Giehtačálus/Manus
• Bagadalli višuvdnačálus
• Bargoveahka- ja neavttárlistu
• Goluid rehkenastin dohkkehuvvon rehkenastinskovvái
• Áigeplána, báddenplána ja vurdojuvvon gárvvistanbeaivemearri dahje vuosttaščájáhusa beaivemearri.
• Márkanastinplána
• Ruhtadanplána

Geavat dán bušeteren- ja raporterenskovi go ozat buvttadandoarjaga.

Ovttaskasmearrádusaid maid Internašunála Sámi Filbmainstituhtta dahká sáhttá váidit Norgga Kultur- ja dásseárvodepartementii.

ISFI meannuda ášši guđa vahkkus.

Buvttadandoarjaga ohcanáigemearit leat guovvamánu 1. beaivi, miessemánu 1. beaivi ja juovlamánu 1. beaivi.

Ovttaskasmearrádusaid maid Internašunála Sámi Filbmainstituhtta dahká sáhttá váidit Norgga Kultur- ja dásseárvodepartementii.

Ohcamušat ovdal ođđajagimánu 1.beaivvi 2024 leat ain dan boares ohcanportálas, ja mii eat sirdde dáid ođđa ohcanportálii. Don beasat ain geahččat du ovddit áššiid dan boares portálas, ja dáid áššiid raporteren dáhppáhuvvá maid nu go ovdal. Ođđa ohcamušaid raporteren lea dán ođđa portala bokte.

Jus doarjja máksojuvvo guovtti oasis, de fertet áiggebále raporteret dahje ohcat áigemeari maŋiduvvot.

Ohcamušat sáddejuvvon 2023 ja boarrasit: Raporta sáddejuvvo e-poasttii rapport@isfi.no ja galgá čujuhuvvot doarjaga referánsanummarii.

Mildosat mat galget čuovvut raporterema

• Rehketdoallu
  Rehketdoallu galgá čájehit buot goluid juolluduvvon prošeavttas. Jus raporteret mátkestipeandda anu, de galggat rehketdoalu sajis sáddet guittiid mat duođaštit bušehterejuvvon goluid. Borramuš- ja vuodjingolut eai gokčojuvvo.
• Prošeavtta ruhtadeapmi
  Spesifisere ja čilge buot ruhtadeami prošeavttas ja gii prošeavtta ruhtada.
• Prošeaktarehketdoallu
  Gáibiduvvo dohkkehuvvon revisora rehketdoallodárkkisteapmi jus doarjja lea NOK 200 000 dahje eanet. Muđui galgá rehketdoalli vuolláičállán buot rehketdoaluid.
• Buvttadandoarjja
  Buvttadandoarjaga raportereme oktavuođas galgá čuovvovaš sáddejuvvot ISFIi: filbmafiila, plakáhttagovva, vihtta allakvalitehta stillgova ja filmma oanehis čilgehus

Váilevaš raporteren / Njuolggadusaid rihkkun

Jus doarjaga vuostáiváldi rihkku doarjjanjuolggadusaid dahje ii raportere ruhtageavaheami, de sáhttá dat čuohcit boahttevaš doarjjajuolludemiide. Rihkkun dán oktavuođas rehkenastojuvvo ISFI njuolggadusaid rihkkumin jus doarjja ii geavahuvvo doarjjaeavttuid mielde ja/dahje jus rihkku dahje ii čuovo ISFI mearrádusa mii lea dahkkojuvvon lága ja/dahje láhkaásahusa olis. Rihkkumiid oktavuođas sáhttá ISFI maiddái válljet bidjat johtui čuovvovaš ráŋggáštemiid:

• Bissehit doarjjamáksima guoskevaš prošektii.
• Bissehit doarjjamáksima doarjaga vuostáiváldi eará prošeavttaide.
• Gáibidit ahte olles doarjja dahje oassi doarjagis máksojuvvo ruovttoluotta.
• Mearridit doarjaga vuostáiváldái gitta 3 jagi errenáiggi, go ii juolluduvvo doarjja.
• Jus lea mearkkašahtti rihkkun, de galgá ISFI dakkaviđe bissehit buot doarjjamáksámušaid guoskevaš prošektii.