Mis leat rievdan doarjjagáibádusat

Buvttadeaddji ja giehtačálli dahje bagadalli galget leat sápmelaččat

Internašunála Sámi Filbmainstituhtta lea rievdadan doarjjaortnegiid gáibádusaid. Oažžundihte doarjagiid ISFI:s galgá dál álo leahkit sámi buvttadeaddji dahje mielbuvttadeaddji gii ohcá doarjaga. Dasa lassin galgá bagadalli dahje giehtačálli leat sápmelaš. Juohke doarjjasuorggis lea maid dál gáibádus ahte ohcci galgá leat sámegielat dahje sápmelaš.

– Ulbmil dáinna rievdadusain lea nannet sámi filbmabuvttadanfitnodagaid ja buvttadeaddjiid. Mii jáhkit dát nanne sámi filbmabirrasa, movttiidahttá ja buktá vel eanet ođđa ja buori filbmavejolašvuođaid sámi filbmadahkkiide. Mii illudit oažžut sisa ođđa ohcamušaid main lea sámi vuolggasadji ja sámi filbmadahkkit guovddáš bargit, dadjá ISFI direktevrra Anne Lajla Utsi.

– Mii sávvat ahte dát rievdadus maiddái movttidáhttá eambbogiid ásahit ja hukset sámi filbmabuvttadan fitnodagaid, go dan sámi filbmabiras dál dárbbaša go nu ollu filmmat ráhkaduvvojit, dadjá ISFI direktevrra Anne Lajla Utsi.

Sámi filbmabuvttadeaddjit leat dehálačča

Ovdal sáhtte guovttis dáid golbma guovddáš rollain filbmabuvttadeamis leat sápmelaččat dahje sámegielagat.

– Sámi filbmabuvttadeaddjit leat dehálačča. Mii háliidat hukset gelbbolašvuođa sámi filbmadahkkiid gaskka, ja mii háliidat eanet sámegielat buvttademiid. Dát sihkkarastá maid ahte gelbbolašvuohta ja árvohuksen filbmabuvttademiin loktejuvvo ja bisuhuvvo sámis. Dán bokte mii oažžut eanet sámegielat filmmaid, ja ahte eaiggátvuohta sámi filmmaide bissu Sámis, dadjá ISFI direktevrra Anne Lajla Utsi.

Sihkkarastit Sámi eaiggátvuođđa Sámi muitalusaide

Jos buvttadeaddji guhte ohcá doarjaga ii leat sápmelaš, ferte son laktit prošektii mielde sápmelaš mielbuvttadeaddji, vai sáhttá ohcat buvttadandoarjaga ISFI:s. Dát gáibádus lea bidjon sihkkarastin dihtii Sámi eaiggátvuođa Sámi muitalusaide ja hukset Sámi filbmaealáhusa ja Sámi filbmabuvttadanfitnodagaid.

International Sámi Film Institute (ISFI) ulbmil

ISFI rolla lea doarjut, ruhtadit ja loktet gelbbolašvuođa sámi filmmas ja sámi filbmadahkkiid gaskka. Internašunála Sámi Filbmainstituhtta galgá nannet sámi filbmabuvttadeami ja loktet gelbbolašvuođa ja ekonomalaš vejolašvuođaid ovdánahttit, buvttadit ja čájehit sámegielat filmmaid. Dasa lassin lea ISFI instituhtta mii ovddida ja nanne ovttasbarggu gaskkal eará álgoálbmot filbmadahkkiid ja ásahusaid riikkaidgaskkasaččat.

ISFI:s sáhttá ohcat doarjaga guđa suorggis

Leat guhtta iešguđet suorggi main sáhttá ohcat doarjaga sámi filbmadahkama olis. Doarjagiid suorggit leat ovdánahttin, giehtačálus, buvttadeapmi, distribušuvdna, mátke-ja gelbbolašvuođa stipeanda, ja njuovžilisdoarjja. Juohke suorggis lea dál gáibádus ahte ohcci galgá leat sámegielat dahje sápmelaš ja ahte filmmaid dialogat leat sámegielaide.

Dán jagi galgá ISFI juolludit badjelaš 10 miljovnna NOK sámi filbmadahkamiid oktavuođas. ISFI juolludii 2022:is lagabui 9 miljovnna NOK iešguđetge doarjagiidde, ja 16 iešguđet sámi filbmabuvttadeami ožžo dalle doarjaga.