LOGA ISFI 2025 JAHKEDIEĐÁHUSA

Internašunála Sámi Filbmainstituhta 2025 jahkedieđáhus

 

Jahkedieđáhus 2025 čájeha ahte leamaš ollu doaimmat, čielga bohtosat ja strategalaš dehálaš olahusat Internašunála Sámi Filbmainstituhtas. Instituhta lea hálddašan doarjjaortnegiid, leamaš fokus nana dáiddalaš kvalitehtii, čađahan máŋga gelbbolašvuođaloktendoaimma, filbmagaskkusteami ja mis leat nannejuvvon internašunála ovttasbarggut. ISFI lea nannen sámi filmma saji, ja maid ovdánahttán sámi filmma vuogádaga dáiddalaččat, kultuvrras ja servvodagas muđuid, sihke sámis, našunálalaččat ja internašunála dásis.

2025 duođašta ahte ISFI:s lea guovddáš ja dárbbašlaš rolla sámi filbmasuorggi ovdáneamis. Dat alla ohcciidlohku ja viiddis aktivitehta buot osiin árvoráiddus duođašta ahte sámi filbmasuorgi lea ahtanuššamin, muhto maiddái ahte lea dárbu lasihit kapasitehta, einnostahttivuođa ja nannet ISFI hálddahuslaš ruhtadeami. Seammás lea sámi filmmain ja TV-ráidduin 2025:s olahan historjjálaš alla riikkaidgaskasaš oinnolašvuođa ja ávvudeami, mii čielgasit čájeha sámi filmmaid kvalitehta, relevánssa ja váikkuhanvejolašvuođaid.

Bargu našunála mandáhtain lea leamaš guoddi strategalaš fokus vássán jagi. ISFI lea álggahan organisašuvdnahuksema, ja stuoridandoaimmat leat áibbas dárbbašlaččat go galgá sihkkarastit instituhta vejolašvuođa hálddašit dakkár mandáhta fágalaš, hálddahuslaš ja ceavzilis vuogi mielde. Instituhtas lea eanet go 15 jagi hárjáneapmi, nanu fágagelbbolašvuohta ja viiddis riikkaidgaskasaš fierpmádat, ja ISFI lea bures ráhkkanan váldit badjelasas nannejuvvon našunála ovddasvástádusa mas lea váldoovddasvástádus sámi filmmain boahtteáiggis.

Seammás ferte sámi filmmaid ovdáneami gehččot viidát servodatoktavuođas. Sámi filbmamáidnasat leat dehálaččat duohtavuođa ja seanadeami oktavuođas. Filmmat rahpet saji máŋggabealat ja dehálaš sámi perspektiivvaide. Filbma doaibmá guovddášarenan gulahallamii, reflekšuvdnii ja máhttojuohkimii, sihke siskkáldasat Sámis ja internašuvnnalaš gehččiide.

Go ISFI dál lávke 2026:i, de áigu instituhtta vuoruhit nannet organisašuvnna hálddahuslaččat, ja maid strategalaš áŋgiruššat ovddidit filmmaid, tv-ráidduid, gelbbolašvuođa ja taleanttaid huksema, ja internašunála ovttasbargguid. Seammás áigu ISFI ain bargat dan ovdii ahte sámi filmmaide sihkkarastojuvvojit ovttaárvosaš eavttut, ahte sámi filbmadahkkiin galgá leat duohta iešmearrideapmi ja ahte olahit našunála- ja internašunála filbmamárkaniidda.

Jahki 2025 čájeha nana olahusaid ja leamaš maid dehálaš luoddaearru. Nášunála mandáhta bokte lea ISFI ožžon váldo ruhtadeami ja hálddašeami sámi filmmaide. Mis leat čielga mihttut ja ealli sámi filbmabiras. Mii illudat boahtteáigái daningo sámi filmmain lea dál nana ja guoddevaš boahtteáigi.

Anne Lajla Utsi
Direktevrra
Internašunála Sámi Filbmainstituhtta

Guovdageaidnu, guovvamánu 26. beaivvi 2026

---

Loga olles jahkedieđáhus (Dušše dárogillii):

LOGA DÁS

 

---