Ovdánahttin­doarjja

ISFI addá ovdánahttindoarjaga buot šáŋŋeriin. Doarjjaortnega ulbmilin lea doarjut oanehisfilmmaid, dokumentáraid, guhkesfilmmaid ja ráidduid ovdánahttinmuttu. Interaktiiva ja speallobuvttadeamit gullet maiddái dán doarjjaortnegii, ja dát sáhttet ohcat ovdánahttindoarjaga máŋgga muttus.

Ovdánahttindoarjaga ulbmilin lea sihkkarastit ahte prošeakta doallá alimus vejolaš dáiddalaš ja filbmafágalaš kvalitehta nationála ja riikkaidgaskasaš dásis. Mii ohcat prošeavttaid mat leat auteanttalaččat ja main lea nana sámi kultuvrralaš čanastupmi ja main prošeavtta váldodialoga lea sámegillii. Prošeavttat main mánát ja nuorat leat ulbmiljoavkun, vuoruhuvvojit erenoamážit.

• Sámi buvttadanfitnodat, juogo váldo- dahje mielbuvttadeaddjin, man váldoulbmilin lea audiovisuála buvttadeapmi ja mii lea registrerejuvvon Sámis, Norggas dahje EEO-riikkas.
• Ovdánahttindoarjja sáhttá juolluduvvot oasusfitnodahkii. Eará fitnodagat mat leat registrerejuvvon ovttadat- ja fitnodatregistarii Norggas dahje eará EEO-riikkas, sáhttet maid ohcat jus supmi lea vuollel NOK 200 000.

Jus galgá oažžut doarjaga ISFI:s, de ferte sihke ohcci ja prošeakta deavdit ISFI oppalaš eavttuid (Kulturteasta).

Don sáhtát ohcat máŋgga ovdánahttinmuttus. Konsuleanta ferte dohkkehit juohke muttu ovdáneami ovdalgo nuppi muddui sáhtát ohcat. Don sáhtát ohcat ovdánahttindoarjaga ovdánahttit prošeavtta dassážii go dahkko buvttadanmearrádus.

Ovdánahttindoarjja ii dáhkit viidáset doarjaga buvttadeapmái. Jus ISFI addá viidáset doarjaga prošektii, de rehkenastojuvvo juolluduvvon ovdánahttindoarjja oassin ollislaš doarjagis.

Raporterema oktavuođas gáibiduvvo ahte rehketdoallodárkkisteaddji lea dohkkehan rehketdoalu, jus doarjja lea NOK 200 000 dahje eanet. Jus doarjjasupmi lea vuollel NOK 200 000, de galgá rehketdoalli vuolláičállit rehketdoalloraportta iige gáibiduvvo dárkkistanraporta.

Ovdánahttindoarjagis ii leat ohcanáigemearri ja ohcamat meannuduvvojit dađistaga.