Ovdánahttin­doarjja

Internašunála Sámi Filbmainstituhta áigumuš dáinna doarjjaortnegiin lea doarjut ámmát filbmadahkkiid oanehisfilmmaid, dokumentárafilmmaid, guhkesfilmmaid ja ráidduid ovdánahttinbargguid gitta buvttadeami rádjai. Maiddái interaktiiva buvttademiid, spillaid ja XR buvttademiid.

Ovdánahttindoarjaga ulbmil lea sihkkarastit ahte prošeavttas lea buoremus vejolaš dássi.
Viidáseappot galgá dat leat vuođđun meannudeapmái maid ISFI dahká go árvvoštallá galgá go juolludit viidáset doarjaga filbmaprošeavtta buvttadeapmái, jus ohccojuvvo.

Ohcci sáhttá leat sápmelaš čálli, bagadalli, buvttadeaddji dahje daid joavku. Ovdánahttindoarjja sáhttá juolluduvvot ovttaskas čállái dahje bagadallái guhte čállá giehtačállosa, dahje buvttadeaddjái dahje daid jovkui. Jos doarjaga vuostáváldi lea buvttadeaddji, ferte son buktit ovdán iežas šiehtadusa giehtačállosa čálliin, jos ISFI dan gáibida. Doarjaga vuostáiváldi ferte duođaštit movt ja masa ruhtadeapmi lea geavahuvvon.

Ovdánahttindoarjja sáhttá juolluduvvot oasussearvái (AS, AB, Oy) dahje ovttaolbmofitnodagaide jus ohcan lea NOK 200 000 dahje vuollel.

Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje giehtačállosa čálli atná iežas sápmelažžan dahje lea sámegielat.

Ovdánahttindoarjaga ohcci ja vuostáiváldi ferte leat sámi buvttadandoaimmahat.

ISFI árvvoštallá prošeavtta oppalaččat prošeavtta dáiddalaš kvalitehta vuođul, ja eavttuid vuođul maid dát njuolggadusat bidjet.

Doarjja lea čadnon sámi kultuvrii ja gillii. Leat čuovvovaš gáibádusat prošeavttaide maid ohcet doarjaga:

• Prošeakta galgá ollásit leat sámegillii.
• Prošeavtta guovddáš váldodoaimmain galget leat sápmelaččat; nu ahte buvttadeaddji dahje mielbuvttadeaddji, ja bagadalli dahje giehtačállosa čálli atná iežas sápmelažžan dahje lea sámegielat.
• Prošeavttas galgá leat sámi fáddá/temá.
• Prošeavttat maid ulbmiljoavkun leat mánát ja nuorat vuoruhuvvojit erenoamážit.
• Filmma váldogiellan galgá leat sámegiella.

ISFI árvvoštallá deavdá go prošeakta gáibádusaid sámi gullevašvuođa ja sámegiela hárrái.

Buvttadandoarjja máksojuvvo dábálaččat guovtti oasis; 75 % go doarjjaoažžu čálalaččat lea dohkkehan doarjjalohpádusa, ja 25 % doarjagis máksá ISFI go lea dohkkehan dorjojuvvon prošeavtta raporterema.

Ovdánahttindoarjaga lohpádus ii mielddisbuvtte lohpádusa viidáset ruhtadoarjagii buvttadeapmái, muhto lea vejolaš maŋŋel ohcat doarjaga seamma prošektii.

Jus ISFI doarju prošeavtta viidáseappot, de adnojuvvo juolluduvvon ovdánahttindoarjja oassin ollislaš doarjagis.

ISFI doarjjalohpádus lea fámus golbma mánu juolludanbeaivvi rájes. Jus doarjjavuostáiváldi ii leat dohkkehan doarjaga eavttuid golmma mánu sisa, de gessojuvvo doarjja ruovttoluotta almmá dieđu haga.

Ovttaskasmearrádusaid maid Internašunála Sámi Filbmainstituhtta dahká sáhttá váidit Norgga Kultur- ja dásseárvodepartementii.

Ovdánahttindoarjaga ohcamii eai leat ohcanáigemearit ja ohcamat meannuduvvojit dađi mielde.
ISFI meannuda ášši guđa vahkkus.

Ovdanáhttindoarjagiidda eai leat ohcanáigmearit ja dáid sáhttá ohcat dárbbu mielde.

Ohcamušat ovdal ođđajagimánu 1.beaivvi 2024 leat ain dan boares ohcanportálas, ja mii eat sirdde dáid ođđa ohcanportálii. Don beasat ain geahččat du ovddit áššiid dan boares portálas, ja dáid áššiid raporteren dáhppáhuvvá maid nu go ovdal. Ođđa ohcamušaid 2024 rájes lea raporteren dán ođđa portala bokte.

Jus doarjja máksojuvvo guovtti oasis, de fertet áiggebále raporteret dahje ohcat áigemeari maŋiduvvot.

Ohcamušat ovdal ođđajagimánu 1.beaivvi 2024 : Raporta sáddejuvvo e-poasttii rapport@isfi.no ja galgá čujuhuvvot doarjaga referánsanummarii.

Mildosat mat galget čuovvut raporterema

• Rehketdoallu
  Rehketdoallu galgá čájehit buot goluid juolluduvvon prošeavttas. Jus raporteret mátkestipeandda anu, de galggat rehketdoalu sajis sáddet guittiid mat duođaštit bušehterejuvvon goluid. Borramuš- ja vuodjingolut eai gokčojuvvo.
• Prošeavtta ruhtadeapmi
  Spesifisere ja čilge buot ruhtadeami prošeavttas ja gii prošeavtta ruhtada.
• Prošeaktarehketdoallu
  Gáibiduvvo dohkkehuvvon revisora rehketdoallodárkkisteapmi jus doarjja lea NOK 200 000 dahje eanet. Muđui galgá rehketdoalli vuolláičállán buot rehketdoaluid.
• Ovdánahttindoarjja
  Ovdánahttindoarjaga raporterema oktavuođas fertet sáddet vejolaš pilohta, scripta ja eará materiála mii lea gárvvis prošeavtta čađaheamis.

Váilevaš raporteren / Njuolggadusaid rihkkun

Jus doarjaga vuostáiváldi rihkku doarjjanjuolggadusaid dahje ii raportere ruhtageavaheami, de sáhttá dat čuohcit boahttevaš doarjjajuolludemiide. Rihkkun dán oktavuođas rehkenastojuvvo ISFI njuolggadusaid rihkkumin jus doarjja ii geavahuvvo doarjjaeavttuid mielde ja/dahje jus rihkku dahje ii čuovo ISFI mearrádusa mii lea dahkkojuvvon lága ja/dahje láhkaásahusa olis. Rihkkumiid oktavuođas sáhttá ISFI maiddái válljet bidjat johtui čuovvovaš ráŋggáštemiid:

• Bissehit doarjjamáksima guoskevaš prošektii.
• Bissehit doarjjamáksima doarjaga vuostáiváldi eará prošeavttaide.
• Gáibidit ahte olles doarjja dahje oassi doarjagis máksojuvvo ruovttoluotta.
• Mearridit doarjaga vuostáiváldái gitta 3 jagi errenáiggi, go ii juolluduvvo doarjja.
• Jus lea mearkkašahtti rihkkun, de galgá ISFI dakkaviđe bissehit buot doarjjamáksámušaid guoskevaš prošektii.