Doarjaga dieđut
ISFI sáhttá doarjut Sámi filbmaprošeavttaid ovdánahttima buot šáŋŋeriin. Ovdánahttin sáhttá sisttisdoallat buot osiid bargguin mat gullet ovdabuvttadeapmái.
Internašunála Sámi Filbmainstituhta áigumuš dáinna doarjjaortnegiin lea doarjut ámmát filbmadahkkiid oanehisfilmmaid, dokumentárafilmmaid, guhkesfilmmaid ja ráidduid ovdánahttinbargguid gitta buvttadeami rádjai.
Ovdánahttindoarjaga ulbmil lea sihkkarastit ahte prošeakta doallá buoremus vejolaš kvaliteahta.
Viidáset galgá dát addit vuođu dan meannudeapmái maid ISFI dahká go árvvoštallá galgágo juolludit viidáset doarjaga, jus ohcet, filbmaprošeavtta buvttadeapmái.
Ohcci galgá leat sápmelaš dahje eará álgoálbmot čálli, bagadalli, buvttadeaddji dahje daid joavku. Ovdánahttindoarjja sáhttá juolluduvvot ovttaskas čállái dahje bagadallai guhte čállá giehtačállosa, dahje buvttadeaddjái dahje daid jovkui. Jos doarjaga vuostáváldi lea buvttadeaddji, ferte son buktit ovdán iežas šiehtadusa giehtačállosa čálliin, jos ISFI dan gáibida. Doarjaga vuostáiváldi ferte duođaštit mo ja masa ruhtadeapmi lea geavahuvvon.
Sápmelaččat fertejit leat guovddáš rollain prošeavttas; nu ahte juogo buvttadeaddji dahje mielbuvttadeaddji lea sápmelaš dahje sámegielat, ja lassin bagadalli dahje giehtačállosa čálli lea sápmelaš dahje sámegielat.
Oažžun dihtii doarjaga ISFI:s ferte ohcci ja prošeakta deavdit obbalaš doarjjagáibádusaid, ja daid gáibádusaid mat gusket vissis prošektii. ISFI árvvoštallá prošeavtta oppalaččat prošeavtta dáiddalaš hámi vuođul, ja maid geatnegasvuođaid vuođul maid dát njuolggadusat bidjet.
Doarjjajuolludeapmi lea čátnon sámi kultuvrii ja gillii. Čuovvovaš gáibádusat leat prošeavttaide mat ohcet doarjaga:
Prošeakta galgá aivve sámegillii hábmejuvvot.
Prošeavtta guovddáš váldodoaimmain galgá leat sápmelaš dahje sámegielat, nu ahte álo juogo buvttadeaddji dahje mielbuvttadeaddji lea sápmelaš dahje sámegielat, ja lassin bagadalli dahje giehtačállosa čálli galgá leat sápmelaš dahje sámegielat. Ohccit fertejit ieža identifiseret iežaset sápmelažžan dahje sámegielagin go ohcet doarjaga.
Prošeavttas galgá leat sámi fáddá.
Prošeavttat main ulbmiljoavku leat mánát ja nuorat, vuoruhuvvojit erenoamážit.
Filmma váldogiella galgá leat sámegiella.
ISFI guorahallá oppalaččat konkrehta árvvošteami vuođul deavdágo prošeakta sámi gullevašvuođa gáibádusa.
Ovdánahttindoarjja máksojuvvo dábálaččat guovtti oasis; vuosttaš oassi go doarjjaoažžu čálalaččat lea dohkkehan doarjjalohpádusa ja nuppi oassi dan maŋŋá go ISFI lea dohkkehan dorjojuvvon prošeavtta raporterema.
Doarjjalohpádus ovdánahttimii ii mielddisbuvtte lohpádusa viidáset ruhtadoarjagii ovddidit buvttadeami, muhto lea vejolaš maŋŋá ohcat doarjaga seammá prošektii.
Jus ISFI doarju prošeavtta viidáset, de gehččojuvvo juolluduvvon ovdánahttindoarjja oassin dan ollislaš doarjagis, maid ii leat geatnegas máksit ruovttoluotta.
ISFI doarjjalohpádus lea fámus golbma mánu juolludanbeaivvi rájes. Jus doarjjavuostáiváldi ii leat dohkkehan doarjaga eavttuid golmma mánnui, de gessojuvvo doarjja ruovttoluotta almmá dieđu haga.
Kultur- ja dásseárvodepartemeanta lea váiddaásahus ISFI eaŋkilmearrádusaid ektui.
Ovdanáhttindoarjagiidda eai leat ohcanáigmearit ja dáid sáhttá ohcat dárbbu mielde.