Buvttadan­doarjja

ISFI addá buvttadandoarjaga buot šáŋŋeriidda ja lávdeneutrála buvttademiide. Doarjjaortnega ulbmil lea doarjut oanehisfilmmaid, dokumentáraid, guhkesfilmmaid ja ráidduid buvttadanmuttu.

Buvttadandoarjaga ulbmil lea sihkkarastit ahte prošeakta doallá alimus vejolaš dáiddalaš ja filbmafágalaš kvalitehta nationála ja riikkaidgaskasaš dásis. Mii ohcat prošeavttaid mat leat auteanttalaččat ja main lea nana sámi kultuvrralaš čanastupmi ja main filmma váldodialoga lea sámegillii. Prošeavttat main mánát ja nuorat leat ulbmiljoavkun, vuoruhuvvojit erenoamážit.

Doarjjaortnet galgá maid leat mielde huksemin innovatiiva ja ceavzilis sámi filbmaealáhusa mii lea geasuheaddji sihke nationála ja riikkaidgaskasaš dásis ja mii nanne sámi filbmaealáhusa.

• Sámi buvttadanfitnodat, juogo váldo- dahje mielbuvttadeaddjin, man váldoulbmilin lea audiovisuála buvttadeapmi ja mii lea registrerejuvvon Sámis, Norggas dahje EEO-riikkas.
• Buvttadandoarjja sáhttá juolluduvvot oasusfitnodahkii. Eará fitnodagat mat leat registrerejuvvon ovttadat- ja fitnodatregistarii Norggas dahje eará EEO-riikkas, sáhttet maid ohcat jus supmi lea vuollel NOK 300 000.

Searvebuvttadeamit main lea sámi buvttadeaddji:
ISFI buvttadandoarjagat gáibidit váldonjuolggadussan unnimustá 51 % sámi eaiggátvuođa prošeavttas, ja ISFI galgá dohkkehit searvebuvttadanšiehtadusaid. ISFI árvvoštallá muttolaččat dán gáibádusa searvebuvttadanohcamiin.

Jus galgá oažžut doarjaga ISFI:s, de ferte sihke ohcci ja prošeakta deavdit ISFI oppalaš eavttuid (Kulturteasta).

ISFI buvttadandoarjja lea almmolaš doarjja.
ISFI buvttadandoarjaga sáhttá ohcat máŋgga geardde.

Čuovvovaš dieđut galget leat mielde buvttadandoarjaga ohcamis:

• Dokumentašuvdna ahte ohccis lea fitnodat mii lea registrerejuvvon ovttadat- ja fitnodatregistarii Norggas dahje eará EEO-riikkas.
• Buvttadanfitnodaga CV, ja čuovvovaš rollaid namma ja CV: váldobuvttadeaddji, giehtačállosa čálli ja bagadalli
• Searvebuvttadanšiehtadus sámi buvttadeddjiin jus váldobuvttadeaddjis ii leat sámi eaiggátvuohta
• Giehtačálus
• Eanemusat ovtta siiddu synopsis ja one-liner
• Bagadalli bagadankonseaptta ovdanbuktin
• Buvttadeaddji buvttadanstrategiija
• Moodboard/prošeavtta visuála ovdanbuktin
• Listu mas leat bargit ja neavttárat
• Goluid rehkenastin dohkkehuvvon rehkenastinskovis
• Ovdánanplána, báddenplána ja árvvoštallojuvvon loahpahanbeaivi dahje vuosttaščájálmasbeaivi
• Márkanfievrridanplána dahje B2B ovdanbuktin
• Ruhtadanplána

Raporterema oktavuođas gáibiduvvo prošeaktarehketdoallu man rehketdoallodárkkisteaddji lea dohkkehan jus doarjja lea NOK 200 000 dahje eanet. Muđui ferte rehketdoalli leat vuolláičállán buot rehketdoaluid.

Prošeakta ferte čuovvut Nordic Ecological Standarda (NES). Dát gáibádus ii gusto dalle jos prošeavtta buvttadanbušeahtta lea vuollel NOK 1 000 000 dalle go ohcá doarjaga.

Internašunála Sámi Filbmainstituhtta lea ođđajagimánu 2026 rájes váldán geavahussii gáibádusa guoddevašvuođaraporteremis prošeavttaide mat vuostáiváldet buvttadandoarjaga. Dát gáibádus vuođđuduvvá davviriikkalaš guoddevašvuođastandárdai NES:ii (Nordic Ecological Standard).

Álgomuttus raporterema ulbmilin lea lasihit diđolašvuođa ja áddejumi das, mo filbmasuorgi bargá guoddevašvuođain, ja gaskaboddosažžat eai leat makkárge ráŋggáštusat das jos ii deavdde standárdda gáibádusaid.

Buvttadandoarjaga ohcanáigemearri lea guovvamánu 1. beaivvi, miessemánu 2. beaivvi, čakčamánu 1. beaivvi ja juovlamánu 1. beaivvi.