ISFI juolluda 1.35 MNOK buvttadeapmái
Almmuhuvvon: 27.02.2025
ISFI juolluda 1.35 MNOK njealji buvttadeapmái
Guokte oanehisfilmma, okta dokumentára ja okta ráidu ožžot oktiibuot 1.35 MNOK buvttadandoarjaga dán jagi vuosttaš juolludanvuorus.
NORGE vs SÁPMI
Dokumentára / Buvttadanfitnodat: Aurinko Film AS / Buvttadeaddji: Johannes Vang, Håvard Bustnes / Čálli: Johannes Vang / Bagadalli: Håvard Bustnes / Juolluduvvon: 400.000 NOK
Go boazodoallit vuitet Alimusrievttis, de čuožžila čiekŋalit gažaldat go ráđđehus ii áiggošii bieggaturbiinnaid váldit eret: Makkár luohttámuš lea min servvodahkii go ráđđehus eahpida čuovvut lága?
TORNA A SURRIENTO
Ráidu / Buvttadanfitnodat: Rein Film Finnmark AS / Buvttadeaddji: Aleksander Olai Korsnes, Mathis Ståle Mathisen / Čálli: Jens Martin Mienna / Bagadalli: Ken Are Bongo / Juolluduvvon: 300.000 NOK
Nuorra italialaš dievdu Carmine árbe bartta Davvi-Suomas ja báhtára Napolis. Davvin son ráhkásmuvvá Maren Ellii, gii lea boazodoalli. Soai ferteba gávdnat vuogi mo gulahallaba ja áddehallaba vaikke eaba hála seamma giela ja go leat maid iešguđetlágan kultuvrralaš duogážat.
ÁRBI
Oanehisfilbma / Buvttadanfitnodat Aurinko Film AS / Buvttadeaddji: Johannes Vang / Čálli: Johannes Vang, Anna Birgitte Wilhelmina Vang / Bagadalli: Johannes Vang / Juolluduvvon: 400.000
Riidu čuožžila árbbi dihtii oappá ja viellja gaskka. Go hávkaduvvon mánnávuođaváivvit bohtet fas oidnosii, ferteba vássánáiggi guorrat vai gávdnaba fas geainnu ovddosguvlui.
ROMSSA TÁKSI
Oanehisfilbma / Buvttadanfitnodat: 7ish Film AS / Buvttadeaddji: Marja Bål Nango / Čálli: Ingir Ane Bål / Bagadalli: Marja Bål Nango / Juolluduvvon: 250.000 NOK
Romssas, Sámit ja dážat orrot ráfálaččat ovttas ássame, muhto go guokte nuorra sámi nieidda vásiheaba nállevealaheami juhkaluvvon dážain vuorddedettiin táksii, de bárgiduvvojit sutno vuorbbit oktii vuorraset sámiiguin. Dáhpáhusat mat dolvot sin bonjulágan ja sevdnjes ija beallái.
Buvttadandoarjaga ulbmil
Doarjaga ulbmil lea sihkkarastit sámegielat filbmaprošeavttaid buoremus vejolaš kvaliteahta ja nannet sámi filbmadahkkiid ja buvttadeddjiid.
ISFI buvttadandoarjaga ohcanáigemearit leat njelljii jagis: guovvamánu 1. beaivi, miessemánu 1. beaivi, čakčamánu 1. beaivi ja juovlamánu 1. beaivi.