RABAS OHCANÁIGI: Sámi filbmabuvttadeaddjiid kursa

RABAS OHCANÁIGI: Sámi filbmabuvttadeaddjiid kursa

 

OĐĐA KURSA FÁLLÁ GELBBOLAŠVUOĐA BARGAGOAHTIT SÁMI FILBMASUORGGIS 

Leatgo beroštuvvan sámi kultuvrras ja visuála máinnasteamis? Dahje leatgo čeahppi organiseret, hábmet vuogas struktuvrra dahje plánet ruhtageavaheami? Hálidivččetgo gávdnat ođđa bargobirrasa sámi filbmasuorggis? Jus vástidit ‘juo’ ovttage ovddit gažaldahkii, loga áinnas viidáseappot!

Internašunála Sámi Filbmainstituhtta (ISFI) ja Sámi Filbmabargiid Searvi (SFS) ovttas ordneba Sámi filbmabuvttadeaddjiid kurssa: Buvttadeaddji vuođđodieđut vai mii ráhčašeimmet saji ođđa sámi filbmabuvttadeaddjiide. Sámi filbmabuvttadeaddjiid kursa čájeha, ahte gávdno eambbo go okta vuohki buvttadit. Dát kursa veahkeha du gávdnat iežat rolla ja bargovuogi sámi visuála muitalusaid máilmmis – min čeahpes sámi filbmadahkkit dieđus leat ofelastimin!

Sámi filbmabuvttadeaddjiid kursa kick-off lágiduvvo gáiddusoktavuođain Zooma bokte miessemánu 24. beaivvi dii 17.00-20.00 CET. Kursa lágiduvvo eŋgelasgillii.


KICK-OFF PROGRÁMMA

 

Oasseváldit buorástahttalit

SFS & ISFI: Sámi buvttadeaddji, mii leat váillahan du!
 Sámi narratiivvalaš iešstivrejupmi: manin mii dárbbašit sámi buvttadeaddjiid, mo sámi buvttadeaddjit sáhttet buoridit min muitalusaid?
– Sámi filbmaprotokolla ovdanbuktin

Bautafilm: Oskar Östergren Njajta ja Therese Högberg
– Bautafilm buvttadanfitnodaga muitalus: mo Oskar ja Therese gávnnaiga buvttadeaddji bálgá ja mo lea sudno bargodynamihka go álgiba ođđa prošeavttain?

Bautafilm buvttadanfitnodat doaibmá Ruoŧa beale Sámis, Jagi 2011 rájes, sii leat buvttadan bálkkašuvvon fikšuvdna- ja dokumentára filmmaid omd. Sámi varra (bagadallan Amanda Kernell) ja Hobbyhorse Revolution (bagadallan Selma Vilhunen). Sin iežaset buvttademiid lassin, Bautafilm maiddái bargá mielbuvttadeaddjin našunála ja riikkaidgaskasaš prošeavttain ja fállá sin čehppodaga line producing dáfus, govvenbáikkiid organiseremis, govvemis, redigeremis ja eará bálvalusain.

Rabas ságastallan

–  Čuovvovaš deaivvadanbáikki ja -áiggi válljen, oasseváldiid sávaldagat makkár fáttát válljejuvvot čuovvovaš deaivvademiide.

Bautafilm buvttadeaddjit Therese Högberg ja Oskar Östergren Njajta. Olgešbeale govva: Nina Andersson.


KURSSA ÁIGETÁVVAL JA ULBMILAT 

Don sáhtát mearridit kurssa vuosttaš deaivvadeami maŋŋá háliidatgo joatkit kurssa gitta jagi 2022 lohpii. Min ulbmil lea ordnet golbma deaivvadeami jagis 2022. Deaivvademiid gaskkas lágiduvvojit persovnnalaš bagadeamit ja eará gulahallan. 

Sámi filbmabuvttadeaddjiid kursa juogaduvvo guovtte dássái: 

Kurssa vuosttaš dássi čáđahuvvo jagis 2022, man fokusis lea oahpahit buvttadeaddji vuođđomáhtu buvttademiide Sámis. Kurssa nubbi dássi lágiduvvo jagis 2023, mii fokusere hukset gelbbolašvuođa davviriikkalaš ja riikkaidgaskasaš filbmasuorggis. Jagi 2022 loahpas mii almmuhit ođđa ohcanáiggi jagi 2023 kursii.

Sámi filbmabuvttadeaddjiid kursa 2022 ollislaš ulbmil lea fállat vejolašvuođaid:

  • Oahpat bargadettiin
  • Bargat du filbmaideain ja oažžut veahkki buvttadeaddji geahččanguovllus mo ovdánahttit muitalusa
  • Mo álgit buvttadanplánain ja bušeahtain – ja mo gávdnat dutnje heivvolaš bargovuogi
  • Heivehit iešguđetge buvttadanvugiid go lea sáhka fikšuvdna-, dokumentára, guhkes dahje oanehisfilmmain
  • Hukset viiddit fierpmádaga Sámis deaivvadettiin kollegaid ja oahpásmuvadettiin ođđa filbmabirrasiidda
  • Oahpásmuvvat filbma buvttadeami iešguđetge bargorolláide ja gávnnahit makkár rollá heivešii dutnje 

 

MO OHCAT KURSII

Sámi filbmabuvttadeaddjiid kursa lea heivvolaš buohkaide, geat leat beroštuvvan filmmain, organiseremis dahje bušeahta plánemis. Don sáhtát maiddái searvat kursii ovttas skihpáriin, geainna hálidivččet ovttasbargat filmmaiguin. Ohcanáigemearri lea 15. beaivvi miessemánu 2022. Sádde ohcamuša čujuhussii sunna@isfi.no juogo eŋgelasgillii dahje sámegillii. 

  1. Motivašuvdnareive (max. A4 beallesiidosaš)
    – Muital iežat birra ja mat leat du čanastagat sámi servošii ja manin áiggošit searvat kursii
  2. CV čoahkkáigeassu (max. A4 beallesiidosaš)
  3. Filbmaidea (ii bákkolaš, max. A4 beallesiidosaš)
    – Muital oanehaččat du filbmaideas ja makkár veahkki dárbbašat dan ovdánahttimii

Mii sávvat oaidnit du Sámi filbmabuvttadeaddjiid kurssas!