ISFI x Netflix Čállinakademiija

RABAS DIEĐIHEAPMI:

ISFI x NETFLIX ČÁLLINAKADEMIIJA
Ovttasbargguin Alma Educationiin

Sámis leat olu čeahpes muitaleaddjit. Mii háliidit gaskkustit dán muitalanárbevieru eanebuidda. Internašunála Sámi Filbmainstituhtta ja Netflix ovttasbarggus  Alma Educationiin álggahit dál “ISFI x Netflix Čállinakademiija”, mii lea ođđa gelbbolašvuođaprográmma sámi giehtačálusčálliid várás. ISFI x Netflix Čállinakademiija vuolggasadji lea ahte čállit ohppet dáidduset buoremusat go besset jotkkolaččat hárjehallat.

Guhtta sámi čálli válljejuvvojit oassálastit, ja Alma Education giehtačálusfakultehta bagadallamiin galgá juohkehaš ráhkadit originála guhkesfilbmagiehtačállosa dahje tv-ráidoevttohusa ja pilohtagiehtačállosa 13 vahkkus.

Bargohápmi

Bargobájis leat golbma dási. Vuosttaš dásis deaivvadit dat guhtta oasseváldi iežaset bagadalliiguin viđa beaivásaš bargobájis gos galget hárjehallat bargat ovttasbargobirrasis ja hukset searvevuođadovddu. Maŋŋel deaivvadit oasseváldit joavkun dábálaš vahkkosaš neahttadeaivvademiin ovttas iežaset bargobádjejođiheddjiin. Dáin deaivvademiin ráhkada juohke čálli vuos giehtačállosa álgoevttohusa dahje tv-ráido-konseaptta njealji vahkkus. Dasto čállet giehtačállosa čuovvovaš gávcci vahkkus, lagas ovttasbarggus Alma muitalusdoaimmaheddjiiguin.

Joavkobarggu hápmi addá oasseváldiide vejolašvuođa juogadit notáhtaid ja veahkehit guhtet guimmiideaset dađistaga go barget proseassa iešguđetge dásiid čađa. Neahttadeaivvademiid oahpahusa lassin lágiduvvojit measttirluohkát maid Netflix-jođiheaddjit ja guovddáš tv-ráido-lágideaddjit ja čállit miehtá Davviriikkaid láidestit.

Loahpas prográmma áigodaga oasseváldit besset ovdanbuktit prošeavttaideaset Netflixii ja eará filbmaovddasteddjiide davviriikkain.

Áigodat

Prográmma lea plánejuvvon lágiduvvot guovvamánu 1. beaivvis miessemánu 5. beaivái 2023.
Oasseváldit fertejit searvat ovttasbargo bargobádjái, almmuhuvvo goas dat šaddá maŋŋelaš. Maŋŋel dan, joavku deaivvada okte vahkkui joavku digaštallamii ja logaldallamiidda.

Ohcanproseassa

Gitta guhtta oasseváldi sáhttet oassálastit bargobájis. Go bargobájis lea nu intensiiva bargovuohki, de vurdojuvvo ahte ohcciin lea hárjáneapmi ovdalaččas giehtačálusčállimiin. Ohccit ohcet guvttiin vejolaš muitaluskonseapttain, ja de ovdánahttet juoppá dáin muitalusain prográmmas jus válljejuvvojit searvái

Gáibádusat

Ohccit berrejit čállán unnimustá ovtta guhkesfilbmagiehtačállosa, TV-drámá-giehtačállosa dahje ovtta buvttaduvvon oanehisfilbmagiehtačállosa. Lea dárbbašlaš máhttit eŋgelasgiela bures sihke njálmmálaččat ja čálalaččat.

Válljenproseassa

Válljengoddi – mas leat Internašunála Sámi Filbmainstituhta ovddasteaddjit – vállje vuos evttohasaid ohcanmateriála vuođul, mas árvvoštallet čálliid jiena, gálggaid, stiilla ja oppalaš dáiddalaš taleantta. Nuppi vuorus bovdejuvvojit evttohasat neahttajearahallamii gos leat ovddasteaddjit ISFIas, Almas ja Netflixas.

Ohcanmateriála mii gáibiduvvo

• CV mas barggut, hárjáneapmi ja filmografiija (jus áigeguovdil) čielggaduvvojit
• Persovnnalaš oahpásmahttinreive mas čilget manne háliidat searvat prográmmii, makkár vuordámušat ja makkár fágalaš mihttomearit dus leat (ii eambbo go 1 siiddu)
• Guokte vejolaš muitaluskonseapta-evttohusa maid háliidivččet ovdánahttit prográmmas (ii eambbo go 1 siiddu goabbáge).
• Dievaslaš giehtačálus (guhkesfilbma, tv-ráidu dahje oanehisfilbma) eŋgelasgillii. Jus dus ii leat giehtačálus eŋgelasgillii, de sáhtát sáddet dievaslaš giehtačállosa originálagillii ja vel 10 siidosaš oasi giehtačállosis mii lea jorgaluvvon eŋgelasgillii. Giehtačálus berre formaterejuvvot fidnosuorggi standárda giehtačálusformáhtii.

 

Visot ohcanmateriála galgá leat eŋgelasgillii ja sáddejuvvot dán: neahttasiiddu bokte. 

Ohcanáigemearri: Juovlamánu 5. beaivvi 2022

 

Oassálastineavttut

Lea nuvttá oassálastit prográmmas. Oasseváldit ožžot €5.000 stipeandda prošeakta oassálastimis. Prošeavttat maid oasseváldit áigot ovdánahttit prográmma áigodaga eai galgga leat čadnon eará buvttadanfitnodahkii dahje rávdnjen/sáttamediai.

Persovdnagáhttenjulggaštus

Don dohkkehat ahte mii čohkket dihto persovnnalaš dieđuid, nu go du nama ja oktavuođadieđuid, ja sáhttit maiddái čohkket dieđuid nu go govaid, jiena ja cealkámušaid. Dáid dieđuid vuođul sáhttit addit dutnje vejolašvuođa searvat bargobádjái ja gulahallat duinna seamma ášši olis, ja maiddái bivdit du vástidit jearahallaniskkademiid bargobáji oktavuođas. Jus leat báddemat main don leat searvvis, de geavahit daid dán mieđiheami mielde. Mii sáhttit maiddái geavahit dieđuid maid attát, nu go dieđuid buot materiálain maid sáddet midjiide go galgat árvvoštallat du gálggaid.

Gulahallandieđut

Liisa Holmberg, Filbmakonsuleanta, Internašunála Sámi Filmainstituhtta: liisa@isfi.no

Foto: Andreas Ausland